2017-08-20 07:43:19 clouds 27o High | Kigali Rwanda

Dukurikire:
 
 

Bamwe mu bacururiza ku mupaka wa Rusizi I bahawe amezi 2 yo kuba bimutse

Yanditswe na IMVAHO NSHYA

Kuya 2017-03-28 14:56:59

 
Share on:
 
Yasuwe:679
 
Yavuzweho:200
 
10
 
10

Ubuyobozi bw’akarere ka Rusizi burasaba abagize urugaga rw’abikorera muri aka karere n’abacuruzi bakorera ku mupaka wa Rusizi ya mbere, kwicara hamwe bitarenze amezi 2 bakareba bimwe mu bicuruzwa bigomba gusigara kuri uwo mupaka n’ibigomba kugaruka mu mujyi rwagati.

Biravugwa ko hatagize igikorwa ubucuruzi mu mujyi wa Rusizi rwagati bushobora kudakorwa neza bwose bukimukira ku mupaka wa Rusizi ya mbere.

Ubu bucuruzi bwimukiye ku mupaka wa Rusizi guhera mu mwaka wa 2005 ubwo bamwe mu bacururizaga mu mujyi rwagati wa Rusizi bamanuraga ibicuruzwa byabo, cyane cyane ibiribwa kugira ngo Abanyekongo bari basanzwe babagurira babibone hafi, dore ko hafi y’ibicuruzwa byose bicururizwa muri uyu mujyi, uhereye ku bifite agaciro kanini kugeza ku nkoko, amagi n’avoka ibyinshi bigurwa n’aba Banyekongo bataboneka bikabura isoko.

JPEG - 145.7 kb
Aha kuri Rusizi ya mbere ngo hari hamaze kwimurirwa ibikorwa byinshi by’ubucuruzi (Foto Bahuwiyongera S)

Mbere byabanje kugaragara nk’aho nta cyo bitwaye n’abacuruzi bagashishikarizwa kwegereza abakiliya ibyo bakora hatitawe ku ngaruka bizagira mu bihe bizaza.

Ibyo byaje gukomeza biva ku biribwa n’abacuruza ibindi hafi ya byose babimanura kuri uriya mupaka ku buryo n’amazu akorerwamo yabuze, bigera n’aho amwe mu mahoteli ahakorera atangira no gucuruza ubuconsho hejuru hagakorera ibikorwa by’amahoteli.

Uko imyaka ishira ngo byaje kugaragara ko mu mujyi rwagati bisa n’aho nta bucuruzi buhasigaye kandi ubuyobozi bushishikariza abikorera kuhubaka amasoko agezweho, nyamara abanyekongo bahaguriraga ibicuruzwa hafi ya bose baratangiriwe ku mupaka, abamotari n’abandi babatwaraga babazana mu mujyi batangira kubura imirimo.

Hatangiye inama zinyuranye basaba abacuruza ibitari ibiribwa kuzamuka, bamwe baranangira, abo mu mujyi na bo bandika ibaruwa ndende mu mwaka wa 2013 bagaragaza ko ubucuruzi burimo gucika mu gihe hadafashwe ingamba zo kuhagarura ibicuruzwa bimwe na bimwe, ariko ikibazo gikomeza kuba agaterera nzamba.

Bamwe mu bacuruzi bakavuga ko aho kugira ngo bazamuke ahubwo bajya gucururiza muri Kongo.

Bagiraga bati “Ntidushobora kugaruka mu mujyi ahubwo tuzakomeza tujya gucururiza muri Kongo kuko twahagiye bareba kandi n’amazu yo mu mujyi arahenze cyane.’’

Mu nama yahuje ubuyobozi bw’aka karere n’abikorera, hanzuwe ko bitarenze amezi 2 hagaragazwa ibikwiye kuguma kuri uyu mupaka ibindi bikahava.

Meya Harelimana Frédéric yagize ati “Ntidushobora kwihanganira akajagari n’umutekano muke ushobora guturuka muri buriya bucuruzi. Ntushobora gutandukanya uhari acuruza n’uwaje guteza umutekano muke kandi namwe murabizi.

Urasanga muri Hoteli harimo ubuconsho, kuri sitasiyo ya Lisansi harimo ibindi, n’ibindi tudashobora kwihanganira.

Mu gihe kitarenze amezi 2 turifuza ko byaba byakemutse, bimwe bikagarurwa mu mujyi. Niba ari amafu muhisemo ko ahasigara akahasigara ibindi bikazamuka.’’

Umuyobozi w’urugaga rw’abikorera muri aka karere Jean Bosco Ngabonziza, asaba abacuruzi bazimurwa kudashyira amananiza ku buyobozi bakubahiriza ibyo basabwa.

atlantis ad

TANGA IGITEKEREZO

 
 
AMATEGEKO AGENGA IYANDIKA RY'IGITEKEREZO CYAWE