2017-06-28 15:02:12 clouds 27o High | Kigali Rwanda

Dukurikire:
 
 

Amajyaruguru: Ubuyobozi bukurikiranye abantu 7425 bahawe inka zitabagenewe

Yanditswe na IMVAHO NSHYA

Kuya 2017-03-22 06:58:01

 
Share on:
 
Yasuwe:314
 
Yavuzweho:200
 
10
 
10

Ubuyobozi bw’intara y’Amajyaruguru buratangaza ko buri gukurikirana abantu bagera ku 7425 mu ntara yose, bahawe inka zitari zibagenewe muri gahunda ya Girinka.

Bamwe mu baturage zari zigenewe bo bavuga ko bagiye bazibura kubera ko batagiraga imbaraga zo gutanga amafaranga bita ay’inzoga y’ikiziriko.

Umunyamabanga nshingwabikorwa w’intara y’Amajyaruguru Jabo Paul, avuga ko ubu batangiye gahunda yo gukurikirana iki kibazo, ku buryo uwo bizagaragara ko yahawe inka atayikwiye azayamburwa igahabwa uwo yagenewe.

Yagize ati “Byagaragaye ko rwose abantu barenga ibihumbi 7, bagize batya bahabwa inka zo muri gahunda ya Girinka zitarabagenewe, ubu twatangiye kubakurikirana nyuma y’igenzura twakoze ubu hamaze kugaruzwa inka zigera ku 151.

JPEG - 127.7 kb
Gahunda ya Girinka yagaragayemo imikorere mibi mu ntara y’Amajyaruguru

Hari abo twasanze zarabyaye turabasaba ko bazizanana n’izazo, kuko bari baratwaye izitabagenewe, nidusanga na bwo yarabyaye akaba yarayiriye, akayigurisha se tuzamufata nk’urimo umwenda wa Leta, nabura icyo kwishyura tuzamuha imirimo ifitiye igihugu akamaro ariko yishyure ibyo yariye mu buriganya”.

Umwe mu baturage bo muri Musanze yagize ati “Rwose urebye uko mbayeho ntiwabona ko nasaba inka ngo nibura impe agafumbire igihe kingana n’umwaka, baraza bakambwira ngo ndi k’urutonde ngategereza none amaso yaheze mu nzira.

Ubushize bwo ushinzwe umutekano yaraje arambwira ngo ninshakishe ibihumbi 15, mbibuze bayihera undi, rwose inzoga y’ikiziriko yakozeho benshi muri Girinka, kandi rero ugiye no kugenzura wasanga abazihabwa ni abarimu, abacuruzi mbese umuntu ubona koko ko yifashije.

Ndifuza ko byajya bikurikiranwa, urutonde rukaba ruri no ku karere kuko iyo barubitse mu kagari ntumenya igihe bagusimbukiye, iyawe igahabwa abandi, ariko nanone ntawabura kuvuga ko abayihaye bayikwiye yabateje imbere”.

Kuri ubu ngo hasigaye inka ibihumbi 17, kugira ngo iyi ntara y’Amajyaruguru yese umuhigo w’inka 35000, yahize ko muri 2018-2020 izaba yamaze kugeza ku bo zigenewe.

Abahabwa inka muri iyi gahunda basabwa kuzifata neza, kugira ngo zibabere isoko y’iterambere, kuko zishobora kubaha amata agurishwa agatanga amafaranga, ndetse zikanatanga ifumbire nayo yifashishwa mu buhinzi hakaboneka umusaruro ushimishije.

atlantis ad

TANGA IGITEKEREZO

 
 
AMATEGEKO AGENGA IYANDIKA RY'IGITEKEREZO CYAWE