2017-08-19 07:41:08 clouds 27o High | Kigali Rwanda

Dukurikire:
 
 

Aboroye inka b’i Ngoma bakomerewe n’ikibazo cy’ibura ry’intanga

Yanditswe na IMVAHO NSHYA

Kuya 2017-04-06 11:19:04

 
Share on:
 
Yasuwe:147
 
Yavuzweho:200
 
10
 
10

Aborozi bo mu karere ka Ngoma, mu ntara y’Uburasirazuba bavuga ko ubworozi bwabo bubangamiwe n’ibura ry’intanga, bigatuma bakomeza kujya kubanguriza inka zabo ku bimasa bisanzwe, ibintu bagaragaza ko bibagora kandi bikagira n’ingaruka ku mukamo babona.

Ni ikibazo kigaragazwa n’aborozi benshi bahawe inka muri gahunda ya Girinka, n’abandi borozi basanzwe mu mirenge itandukanye y’akarere ka Ngoma.

Gashirabake Théoneste wo mu murenge wa Mugesera, yorojwe inka ya Girinka mu mwaka wa 2010, avuga muri iyi minsi kubona intanga bitagishobokera aborozi.

Yagize ati “Ubu kubona intanga biracyari ikibazo, aborozi birirwa bashaka ibimasa, kandi inka ishobora no kukuvunira mu nzira uyikurura uyijyana.Tubonye intanga ku buryo burambye byadufasha cyane.”

JPEG - 232.8 kb
Aborozi barifuza ko intanga zajya zibonekera igihe , kugira ngo barore bizeye umukamo n’iterambere rishingiye ku bworozi

Uyu Gashirabake akomeza avuga hari abagiye bahura n’ikibazo cyo kubura intanga bakajya kubanguriza inka ku bimasa bisanzwe, bikagira ingaruka zuko umukamo wari witezwe utaboneka.

Agira ati “Hari abo byagiye bibaho bakabura ibimasa, bakabanguriza ku bimasa bisanzwe, inka yamara kubyara bakabura umukamo, kandi uko umuturage w’umworozi abura umukamo niko asubira inyuma, kuko atabona amata.”

Mukamana Marie wo mu murenge wa Rukira na we yagize ati “Ikibazo kiri mu kubura intanga ni uko nkanjye w’umubyeyi ntashobora kuba nakwega inka ngo nyijyanye ku mfizi, mu gihe iyo intanga zihari nakwiyambaza veterineri akaza akayiterera mu rugo bitangoye.

Ubu zidahari rero biratugora kuko hari igihe inka irinda ikarindura, twabuze umuntu uyitujyanira ku mfizi, kandi na none kuyijyana kuri ya mfizi ntabwo biba bidushimishije kuko tuba tuzi ko nta musaruro tuzakuraho.”

Icyo aborozi bahurizaho nuko n’iyo inyana yavukishijwe ku nka yatewe intanga umukamo uba mwinshi cyane, ariko babanguriza ku kimasa bigira ingaruka ku mukamo, kuko ugabanuka cyane.

Bugingo Gilbert, Umukozi w’akarere ka Ngoma ushinzwe ubworozi avuga ikibazo gihari atari intanga zabuze, ahubwo byatewe n’ imashini imwe mu gihugu ikora umwuka wa azote ukoreshwa mu kubika izi ntanga, ku buryo bidakunda ko aborozi bose bazibona igihe cyose bazikeneye.

Yagize ati “Ntabwo ari ikibazo gikomeye cyo kuvuga ngo intanga zarabuze, ahubwo ni umwuka ubika intanga.Imashini imwe yigeze gupfa turahagarara amezi agera nko kuri 4, ariko ubu yarakize, ikibazo ni uko itanga Azote igomba gutangwa mu gihugu hose.”

Uyu Veterineri arizeza aborozi ko intanga zamaze kugezwa ku karere ku buryo imbogamizi bari bafite zigiye kubonerwa igisubizo.

Agira ati “Ubu nabizeza ko ku karere intanga zirahari n’Azote baraduhaye, muri ino minsi turi gutera.Turabakangurira kwegera ba veterineri b’imirenge bakabaterera.Ndetse hari na gahunda nziza y’igihugu cyacu yuko yashaka imashini ya 2, izadufasha gukomeza kunoza iki gikorwa cyo gutera intanga, cyane ko ubona abaturage bakishimira kandi bagishyigikiye, kuko kibafasha kuvugurura ubworozi bwabo.”

Ikindi uyu mukozi w’akarere ka Ngoma ushinzwe ubworozi asaba aborozi, ni ukujya bitwararika mu gihe bakoresheje uburyo bwo kubangurira ku mfizi, bakabanza kubimenyesha ba veterineri b’imirenge kugira ngo basuzume niba nta ngaruka byatera, mu rwego rwo kurinda inka zabo kwandura indwara y’amakore; ishobora gutuma inka iramburura.

TANGA IGITEKEREZO

 
 
AMATEGEKO AGENGA IYANDIKA RY'IGITEKEREZO CYAWE