2017-12-12 14:14:08 clouds 27o High | Kigali Rwanda

Dukurikire:
 
 

Abayapani bishimiye ko umuco wabo ufitanye isano n’umuco nyarwanda

Yanditswe na IMVAHO NSHYA

Kuya 2017-06-06 09:18:03

 
Share on:
 
Yasuwe:93
 
Yavuzweho:200
 
10
 
10

Abayapani baba mu Rwanda, bamuritse ibihangano bitandukanye bigaragaza umuco wabo, babigereranya n’umuco nyarwanda, bishimira ko umuco w’ibihugu byombi ufitanye isano.

Muri iki gikorwa cyabereye mu karere ka Muhanga mu mpera z’icyumweru gishize, hagaragajwe ko bimwe mu byo u Rwanda ruhuriraho n’ u Buyapani mu muco, harimo amazina n’inyito y’ibintu.

Bamwe mu Bayapani baba mu Rwanda n’abahagarariye icyo gihugu mu Rwanda baba mu karere ka Muhanga, mu kigo cy’ishuri Nderabarezi (TTC Muhanga) giherereye mu murenge wa Shyogwe, bagaragaje ko gusigasira umuco w’igihugu ari ikintu cy’ingenzi cyane mu mateka y’igihugu, bakaba bashimishijwe cyane no kuba abanyarwanda nabo baha agaciro umuco ndetse bakawusigasira.

JPEG - 189.3 kb
Abahagarariye ambasade y’u Buyapani mu Rwanda, abayabozi ba TTC, ndetse n’ushinzwe uburezi mu Karere ka Muhanga

Uku kwidagadura herekanwa umuco ku bihugu byombi, bavuga ko ari gahunda isanzwe u Buyapani bukora mu bihugu baba bafitanye umubano, ariko bakaba bavuga ko by’umwihariko ku Rwanda hari amagambo abaturage b’u Buyapani bakoresha mu mvugo no mu nyandiko avugwa nk’ikinyarwanda, nubwo ngo biba bidasobanura kimwe.

Umuyobozi ushinzwe Politike y’ubukungu muri Ambasade y’u Buyapani mu Rwanda Shintaro Nakaaki, avuga ko kwerekana umuco mu kigo cy’amashuri bibafasha gusobanura neza umuco w’Abayapani ku bana bashaka gusaba za buruse zo kujya kwiga muri icyo gihugu, dore ko hasigaye hatangwa nyinshi.

Yagize ati “Amarembo arafunguye ku banyeshuri bakeneye gusaba kwiga mu Buyapani binyuze kuri murandasi kuko abemerewe bahabwa ikizami mbere yo kujyayo, abagitsinze bagahabwa ayo mahirwe.»

Mukabatesi Jeanne d’Arc, umuyobozi w’iki kigo, avuga ko kwerekana imico hagati y’ibihugu byombi bituma abanyeshuri barushaho kumenya igihugu cy’u Buyapani ndetse bakaba banitabira ku rugero ruri hejuru gusaba izo buruse zishyurwa ijana ku ijana n’igihugu cy’u Buyapani, akavuga ko ubuyobozi bw’ikigo ari bwo bwabisabye kuko basanganywe umubano n’ubufatanye mu by’uburezi.

Sebashi Claude, umuyobozi w’ishami ry’uburezi mu Karere ka Muhanga, ashimira igihugu cy’u Buyapani umubano mwiza gifitanye n’iri shuri kuko ubu kigiye kohereza undi mukorerabushake uzigisha ubutabire (Chimie), uyu akaba agomba gusimbura uwigishaga isomo ry’ibinyabuzima.

Yagize ati «Kumenya rero amateka n’umuco by’icyo gihugu, ni byiza kuko bizafasha abanyarwanda benshi gusaba buruse ku bagiye mu cyiciro cya kabiri, n’icya gatatu by’amashuri makuru, kuko babishyurira 100%.»

Igihugu cy’u Buyapani gifasha Leta y’u Rwanda kuva mu 1965 mu bijyanye n’amazi, ubuhinzi, ndetse no gutwara ibintu.

MUHIZI ELISÉE

atlantis ad

TANGA IGITEKEREZO

 
 
AMATEGEKO AGENGA IYANDIKA RY'IGITEKEREZO CYAWE