Advertisement
 
 
 
 
 
 
 
 

Amakuru | Mu Ntara | Intara

Abaturage ba Ngoma ntibemeranya na Meya uvuga ko bakora amasaha make   

  Yanditswe na MANISHIMWE NOËL
 June 2016

 
 

Mu gihe umuyobozi w’akarere ka Ngoma Nambaje Aphrodise, mu bihe bitandukanye yagiye agaragaza ko abatuye aka karere bakora amasaha make bikaba byaba impamvu y’ubukene, bamwe mu batuye aka karere ntibemeranya nawe.

Ubwo Perezida wa Repubulika Paul Kagame yasuraga akarere ka Ngoma, umuyobozi w’aka karere Nambaje Aphrodise yamugaragarije ko hakiri imbogamizi z’uko abaturage bari mu bukene, bitewe n’impamvu zirimo no kuba bakora amasaha make.

Icyo gihe yagize ati:“Haracyari ikibazo cy’uko abaturage bacu bakora amasaha make ku munsi, ikigereranyo ku murimo w’ubuhinzi ni amasaha atatu, naho ku yindi mirimo ni amasaha arindwi.”

JPEG - 166.2 kb
Abatuye i Ngoma bemeza ko bitabira umurimo kandi bakawukora amasaha menshi kuko bazi akamaro kawo (Foto Manishimwe N)

Ubushakashatsi ku mibereho y’abaturage buherutse gukorwa bwagaragaje ko akarere ka Ngoma kaza mu turere 10 dukennye mu gihugu, kari ku mwanya wa 9.

Abaturage baganiye n’Imvaho Nshya, batangaje ko batumva impamvu umuyobozi w’aka karere avuga ko bakora amasaha make, mu gihe mu mirimo bakora yiganjemo ubuhinzi, iyo ibihe byagenze neza beza bakanasagurira amasoko, ibi ngo bikagaragarira ku mamodoka usanga acicikana ava mu mujyi wa Kigali aza guhaha muri aka karere.

Mukabahizi Fortunée, umuhinzi-mworozi wo mu murenge wa Rurenge, uvuga ko ugereranyije imiriro itandukanye asabwa gukora akomatanyije nko guhinga, gutekera abana, kwahirira amatungo n’indi, atabasha kubara amasaha akora ku munsi.

Yagize ati:“Iki gihe turimo ntabwo ari icyo gukina, umuhinzi abyuka saa kumi n’imwe nta n’icyayi twe tunywa ukajya mu murima kugeza saa sita, niba ufite inka ukayahirira, ukayiha ubwatsi, guteka, ikigoroba tukajya gutera imbuto.

Muri Ngoma turakora, imodoka ziza hano kugura imyaka ni nyinshi cyane.Kandi burya umukozi wa leta uba wicaye ku ntebe ntiwamugereranya n’umuhinzi uhinga ibyuya bikabira, kuvuga ngo dukora amasaha make, sinabyumva kuko burya n’ibihe bigutoza gukora cyane.”

Undi muturage ukora ubuhinzi bw’inyanya na we yagize ati:“Iyo nagiye guhinga inyanya, mva mu rugo saa kumi n’ebyiri ubwo saa sita nkataha, hanyuma saa munani nkongera nkagaruka mu kazi, buriya umuntu uhinga inyanya ntabwo ajya yicara mu rugo, ni ukwirirwa ukoramo.

Ibyo rero byo kuvuga ngo dukora amasaha make, simbyemera kuko muri iyi minsi umuntu aba akora uko ashoboye ngo atere imbere.”

Aba baturage bagaragaza ko nubwo bitabira umurimo, muri aka karere hagaragara imburamukoro n’ibirara biba bishaka kubeshwaho n’ibyo abandi bavunitse bahinga, bagasanga ari byo bishobora kuba bituma muri aka karere hagaragara ubukene bukabije kuri bamwe.

Akarere ka Ngoma gatuwe n’abaturage basaga ibihumbi 380, ubushakashatsi ku mibereho mu ngo ECV ya 4 bwagaragaje ko 19% by’abaturage bako bakennye cyane, naho 46.8% bakaba bakennye muri rusange.

 

Comments

 
 
Rusizi:Ikibazo cy’imbwa zizerera zikarya abaturage cyahagurukiwe
Rusizi:Ikibazo cy’imbwa zizerera zikarya abaturage cyahagurukiwe

Ikibazo cy’imbwa zizerera zirya abantu mu karere ka Rusizi ngo ntigihangayikishije abaturage gusa, ahubwo gihangayikishije n’ubuyobozi, bukaba busaba abaturage kuba bihanganye igihe cy’imvura (...)

Karongi:Depite Musabyimana yasabye abaturage gukomera kuri ‘Ndi Umunyarwanda
Karongi:Depite Musabyimana yasabye abaturage gukomera kuri ‘Ndi Umunyarwanda

Depite Samuel Musabyimana, yasabye abaturage bo mu karere ka Karongi gukomeza gushyigikira gahunda y’ubumwe n’ubwiyunge, kuko ari byo bizatuma igihugu gikomeza kwihuta mu iterambere, kikaba (...)

Rubavu:Abifuza kuva mu manegeka batuyemo bemerewe amabati
Rubavu:Abifuza kuva mu manegeka batuyemo bemerewe amabati

Ubuyobozi bw’akarere ka Rubavu bwemereye amabati abaturage batishoboye bagera ku 120, bashaka kuva mu manegeka, mu rwego rwo kubafasha gutura mu mudugudu. Ubuyobozi bw’aka karere buvuga ko (...)

Musanze: Umukobwa w’imyaka 20 yihangiye umurimo umwinjiriza 250,000 ku kwezi
Musanze: Umukobwa w’imyaka 20 yihangiye umurimo umwinjiriza 250,000 ku kwezi

Umuhire Catherine, ni umukobwa w’imyaka 20 utuye mu murenge wa Muhoza, mu karere ka Musanze, uvuga ko mu gihe cy’imyaka 2 amaze akora umwuga wo gucura ibyuma bikoreshwa muri feri z’imodoka, ubu (...)

Karongi:Abatuye i Kabuga batewe impungenge n’abajura bahayogoje
Karongi:Abatuye i Kabuga batewe impungenge n’abajura bahayogoje

Abaturage bo mu kagari ka Kabuga mu murenge wa Rugabano mu karere ka Karongi, batewe impungenge n’ubujura bwibasiye ibyuma bitanga ingufu z’amashanyarazi aturuka ku mirasire y’izuba, ibiribwa biri (...)

Advertisement

OPP. MAGERWA, EXPO GROUND, GIKONDO KIGALI, RWANDA PHONE NO : +250-784867952 / 53

© Copyright 2015: Imvaho Nshya. All rights reserved.
Powered by: RPPC.