2017-05-23 06:21:20 clouds 27o High | Kigali Rwanda

Dukurikire:
 
 

Abasaga 80 bafatiwe mu mukwabu wo guhiga abajura muri Ngoma

Yanditswe na IMVAHO NSHYA

Kuya 2016-07-18 12:39:13

 
Share on:
 
Yasuwe:1
 
Yavuzweho:200
 
10
 
10

Abagize inzego z’ubuyobozi n’iz’umutekano mu karere ka Ngoma bagaragaje abasore basaga 80 batawe muri yombi na Polisi mu bihe bitandukanye, bakekwaho kugira uruhare mu bikorwa byo kumena inzu, ubujura bworoheje n’ubwambuzi.

Abagaragajwe biganjemo abakiri urubyiruko Polisi yagiye ita muri yombi bakekwaho ubujura bumaze iminsi bwumvikana hirya no hino mu mirenge 14 igize akarere ka Ngoma, cyane cyane mu mujyi wa Kibungo, aho abaturage bamwe banakekaga ko abajura bakoresha uburozi kuko hari ubwo bibwa bari mu nzu babyuka bagasanga byose byatwawe.

Bamwe batawe muri yombi bakekwaho gukira uruhare mu bujura, kuwa 15 bahurijwe kuri Sitade Cyasemakamba, mu murenge wa Kibungo kugira ngo hagenzurwe neza aho baturuka, ibyo basanzwe bakora, bityo hanamenyekane amakuru ku byo bakekwaho.

JPEG - 135 kb
Mu bafashwe harimo abakekwaho gupfumura inzu z’abaturage (Foto archive)

Gusa abenshi muri aba ntibahakana ko bafatiwe mu cyuho bakora ubujura, hakaba n’abagaragaza ko bari babumazemo igihe kinini, kandi bagaragaza ko batewe ipfunwe n’ibyo bakoze ku buryo biteguwe kubireka burundu, ahubwo bagatekereza ku bikorwa byabateza imbere biciye mu mucyo bakora.

Umwe muri bo yagize ati:“Nafatiwe mu murenge wa Remera, umuntu yantije igare, ndarigurisha, nyuma yo kurigurisha baramfata, nibwo bwa mbere icyaha cy’ubujura cyari kimbayeho.”

Mapendo Gilbert, Umunyamabanga Nshingwabikorwa w’umurenge wa Kibungo, atangaza ko ubu ikibazo cy’ubujura ubuyobozi bwagihagurukiye hakazwa amarondo, gusa n’abaturage bakaba basabwa kunganira inzego zishinzwe umutekano batanga umusanzu igihe bibaye ngombwa, kandi bakajya batangira amakuru ku gihe mu gihe hari uwo bakeka.

Yagize ati:“Kuba twabamenye bakaba babizi iyo ni intambwe ya mbere, ikindi nuko twafashe izo ngamba zo gukaza amarondo kuko hari n’aho byabaga ugasanga koko harimo uburangare bw’abantu cyangwa se umudugudu irondo ridakorwa neza .
Ariko hamwe n’ingambo zo gukaza amarondo navuga ko nko mu cyumweru gishize biragaragaza ko byatangiye gutanga umusaruro kuko ubu nta kibazo cy’ubujura gihari.”

Gitifu w’umurenge wa Kibungo akomeza agaragaza ko mu gihe hakomeza kubaho ubufatanye kuva ku rwego rw’umudugudu n’utugari hagakazwa amarondo kandi n’abantu batuye mu mudugudu bose bakaba bazwi, gahashyirwa imbaraga mu guhanahana amakuru; ngo nta kabuza ko ikibazo cy’ubujura cyari mu bihangayikisha abaturage cyabonerwa umuti uhamye.

Ingingo ya 300 mu gitabo cy’amategeko ahana ibyaha mu Rwanda, iteganya ko umuntu wese ukora ubujura budakoreshejwe ikiboko cyangwa ibikangisho ahanishwa igifungo kuva ku mezi atandatu kugeza ku myaka ibiri, n’ihazabu y’amafaranga y’u Rwanda yikubye inshuro kuva kuri ebyiri kugeza kuri eshanu z’agaciro k’icyibwe cyangwa kimwe gusa muri ibyo bihano.

atlantis ad

TANGA IGITEKEREZO

 
 
AMATEGEKO AGENGA IYANDIKA RY'IGITEKEREZO CYAWE