2017-06-25 09:02:18 clouds 27o High | Kigali Rwanda

Dukurikire:
 
 

Abasaga 300 bahawe akazi ko kubaka imihanda Perezida Kagame yemereye Abanyagakenke

Yanditswe na IMVAHO NSHYA

Kuya 2017-03-21 15:01:08

 
Share on:
 
Yasuwe:635
 
Yavuzweho:200
 
10
 
10

Ubuyobozi bw’Akarere ka Gakenke buvuga ko ibikorwa byo kubaka imihanda Perezida wa Repubulika yemereye abaturage byatangiye, ndetse ko abaturage basaga 300 babonye akazi.

Iyi mihanda Perezida Paul Kagame yayemereye abaturage ubwo yasuraga aka karere muri Werurwe 2016, aho yababwiye ko iriya mihanda igomba kubakwa kandi bigakorwa mu gihe gito.

Muri iyi mihanda harimo n’uva mu karere ka Gakenke ugahinguka ku Giticyinyoni, uciye inzira y’icyaro, ufite ibilometero 78.

Bamwe mu baturage bahawe imirimo muri iyi mihanda, bishimiye ko imihanda barimo kubakirwa izabakura mu bwigunge, by’umwihariko kandi bakaba bishimiye ko babonye akazi bakava mu bushomeri.

JPEG - 107.6 kb
Imihanda ifasha abaturage kwihutisha iterambere. Uyu ugana ku biro by’akarere wubatswe muri 2016

Munyawera Jean Bernard, umwe bagabo babonye akazi mu kubaka iyi mihanda, yagize ati “Kuba Umukuru w’igihugu yaratwemereye imihanda ni igikorwa kigaragaza ko aha agaciro umunyarwanda amukura mu bwigunge, inyungu zayo twatangiye kuzibona twahawemo imirimo, ubu twatangiye gukoramo turahembwa amafaranga akadufasha mu kurihirira abana bacu mu mashuri. Iyi mihanda ije kutworohereza ubuhahirane n’utundi turere kugera mu mujyi wa Kigali”.

Uyu mugabo yakomeje agira ati “Uyu muhanda uzatuma umusaruro wacu ugera aho ujya ku isoko mpuzaturere, n’abana bacu bakoraga ingendo bazenguruka biborohere, igikorwa nk’iki kiba kiziye igihe, kuri njye mbona Perezida wa Repubulika yarakituzaniye gifite inyungu ebyiri, kuduteza imbere no kudukura mu bwigunge, ibikorwa tugiramo uruhare tuzabibungabunga”.

Iyi mihanda abaturage bemerewe yashyizwe muri gahunda yo koroshya ubuhahirane, kuko izanyura mu mirenge yeza kurusha iyindi, aho nk’abanyakigali bazoroherwa kuza kugura umusaruro wabo w’inanasi, ibitoki, ikawa n’amwe mu mabuye y’agaciro.

Umuyobozi w’Akarere ka Gakenke wungirije ushinzwe iterambere ry’ubukungu Niyonsenga Jean Aime, yagize ati “Imihanda yemewe na Nyakubahwa Perezida wa Repubulika yatanze imirimo ku baturage barenga 300, iyi gahunda yo gukora muri iyi mihanda abayihawemo akazi mbere na mbere ni abatishoboye, kandi ibi byabateje imbere, bibakura mu bushomeri.

Ni n’inyungu kandi ku buhahirane bw’Akarere ka Gakenke n’utwo bihana imbibi, ndetse no mu mirenge ikagize, ndasaba abaturage gukomeza kurinda ibyo bagezeho, kandi bagakomeza kuzirikana ubazirikana.”

atlantis ad

TANGA IGITEKEREZO

 
 
AMATEGEKO AGENGA IYANDIKA RY'IGITEKEREZO CYAWE