2017-12-11 11:00:24 clouds 27o High | Kigali Rwanda

Dukurikire:
 
 

Abanya Musanze bishimira ko mihanda Perezida Kagame yabemereye yose yakozwe neza

Yanditswe na IMVAHO NSHYA

Kuya 2017-07-21 10:26:29

 
Share on:
 
Yasuwe:64
 
Yavuzweho:200
 
10
 
10

Abaturage bo mu karere ka Musanze barishimira ko imihanda bemerewe na Perezida Kagame mu myaka 7 ishize, bayibonye none kuri ubu ubuhahirane bukaba bwariyongereye, ndetse buroroha.

Abavuga ibi ni abaturiye inkengero z’umujyi wa Musanze ngo bahoraga bamburirwa mu nzira, ariko ubu ngo imihanda yarakozwe ishyirwaho amatara, ubu bagenda bizeye umutekano.

Habimana Ildephonse, umuturage wo mu murenge wa Muhoza yagize ati “Kagame ubwo yasuraga aka karere kacu yatubwiye ko azadukorera imihanda twamusabye, na we atwizeza ko azayiduha, kuri ubu rero imihanda twarayibonye yaruzuye.

Nakubwira nk’umuhanda uva Nyamagumba ukagera ku Musanze ungana na kilometero zigera kuri 3, nta muntu wahinyuzaga ari wenyine byagusabaga gutegereza undi mugendana, kuko iyo wigabizaga ako kayira barakwamburaga waba nta kintu ufite ugakubitwa ugataha, ariko ubu ni umuhanda wubatswe hakoreshejwe iby’iwacu, aya makoro twitaga ko ari ikibazo, turagenda nta kibazo kandi ntitukivunika”.

JPEG - 378.3 kb
Iyi mihanda itarakorwa aha hantu habaga umutekano muke

Iribagiza Ancile, we yagize ati “Kubaka imihanda yo mu nkengero z’umujyi aho bakunze kwita mu cyaro ni igikorwa Perezida wacu yadukoreye gikomeye cyadusubije ubuzima, nta mugore wageraga saa kumi n’ebyeri akiri mu nzira, kuko yabaga yiteguye guhangana n’amabandi n’insoresore zanywaga urumogi zigategera abantu muri ubwo butsibangira bwo mu mashyamba abukikije.

Ariko kuri ubu turagenda kugera mu gitondo kuko imihanda iragaragara kubera yose ubu ni amatara, ubu nta bwo ntinya kuva mu rugo saa kumi za mu gitondo kuko amatara yatumye ibisambo bihunga, turashima Perezida wacu Kagame Paul”.

Nta bwo ari aba baturage bagana mu byaro bavuga ibi gusa, kuko n’abakoresha imihanda minini bavuga ko ibinyabiziga byabo ngo ntibigisaba ko basimburanya ibyuma bishaje, kuko umuhanda Cyanika-Musanze na wo ubu wasanwe hakiyongeraho n’undi Musanze-Nyakinama yari yarangiritse ku buryo bukomeye, iyi mihanda ikaba yaratwaye amafaranga asaga miliyari 12.

Umuyobozi w’akarere ka Musanze Habyarimana Jean Damascene, yagize ati “Imihanda twasezeranyijwe na Perezida yose kuri ubu yagezweho, ariko na none kuri ubu imihigo irakomeje kuko kuri ubu hari n’indi mihanda ubu tugikora, nayo rwose iri kurangira nkaba ahubwo nasaba abaturage gukomeza kurinda ariya matara yo ku mihanda kuko ni ibikorwa bya buri munyarwanda wese biganisha mu iterambere, kandi bamenye ko bafite Leta ibakunda ikaba ibazigamiye byinshi by’iterambere”.

NGABOYABAHIZI PROTAIS

atlantis ad

TANGA IGITEKEREZO

 
 
AMATEGEKO AGENGA IYANDIKA RY'IGITEKEREZO CYAWE