2017-08-21 15:16:56 clouds 27o High | Kigali Rwanda

Dukurikire:
 
 

Abajura bamburira abaturage mu nkengero z’umujyi wa Muhanga

Yanditswe na IMVAHO NSHYA

Kuya 2016-09-05 08:01:17

 
Share on:
 
Yasuwe:5
 
Yavuzweho:200
 
10
 
10

Bamwe mu baturage bataha ndetse n’abanyura ahitwa ku Kagitarama, mu karere ka Muhanga banyuze mu muhanda uri iruhande rw’aka karere baratangaza ko babangamiwe n’ubwambuzi buhabera mu masaha ya nimugoroba.

Aba baturage bagaragaza ko ubu bwambuzi butizwa umurindi nuko nta matara amurika ahari ugasanga hari umwijima, bakaba bifuza ko hashyirwa amatara abonesha mu masaha ya nimugoroba.

Muhawenayo Jeanne, umwe mu baturage banyura muri uyu muhanda. atangaza ko benshi mu baturage cyane cyane ab’igitsina gore ntawe utinyuka kugeza mu masaha ya saa kumi n’ebyiri n’igice atarataha, ngo keretse ari kumwe n’undi muntu kandi w’umugabo.

JPEG - 89.3 kb
Uyu muhanda ngo mu masaha y’umugoroba haba hari abajura bateze abantu bakabambura bakirukira mu ishyamba

Akavuga ko aka gace iyo uhanyuze nyuma y’ayo masaha utamenya aho abakwamura baturutse ubundi kagahita birukira mu gashyamba kari hafi aho.

Yagize ati:“Nta mugore unyura iriya nzira mu masaha y’umugoroba, iyo ugejeje nyuma ya saa kumi n’ebyiri n’igice utarataha bigusaba gushaka umugabo mumanukana, kuko rwose iyo uri wenyine ntumenya aho baturutse bagushikuza ibyo ufite ubundi bakirukira mu gashyamba kari hirya y’umuhanda.”

Uretse kandi ngo aha hafi y’akarere, benshi mu baturage batuye mu mujyi bavuga ko hari n’utundi duce tumwe na tumwe two mu nkegero z’uyu mujyi wa Muhanga twabaye indiri z’abajura, aho ndetse ngo hamwe na hamwe banahafatira abagore ku ngufu nyuma yo kubacuza utwabo cyane mu masaha ya nimugoroba.

Abaturage bavuga ahakunze kuba abajura cyane ari ku nzira inyura ahitwa ku Kidirishya inyura munsi ya gereza ya Muhanga, ngo mu muhanda uva ku igaraji i Kabgayi werekeza ahitwa i Ruli ndetse no mu muhanda uva mu Ruvumera werekeza mu Rugarama.

Ku bijyanye n’iki kibazo, Uwamariya Beatrice, umuyobozi w’akarere ka Muhanga, atangaza ko bakimenye ndetse ko ngo no mu nama y’umutekano iheruka cyafatiwe ingamba, aho ngo ahakekwa hose ko haba hari aba bajura hashyizwe abashinzwe umutekano bagomba kuharara buri gihe.

Yagize ati:“Ni byo iki kibazo cy’ubwambuzi mu mihanda imwe n’imwe iri mu nkengero z’umujyi twarakimenye ndetse no mu nama y’umutekano iheruka twagifatiye ingamba, abaturage rero nibahumure ubu utwo duce twose dukekwamo abo bajura twemeje ko tugomba gushyiramo abashinzwe umutekano bakaharara, bityo umutekano w’abaturage ugakomeza kugenda neza kandi n’abazafatwa bazahanwa by’intangarugero.”

Ku bijyane n’uko abaturage bifuza ko iyi mihanda yanashyirwamo amatara, Meya Uwamariya avuga ko bagiye kubyigaho bakareba aho bishoboka akazahashyirwa.

atlantis ad

TANGA IGITEKEREZO

 
 
AMATEGEKO AGENGA IYANDIKA RY'IGITEKEREZO CYAWE