2017-06-26 13:56:47 clouds 27o High | Kigali Rwanda

Dukurikire:
 
 

Abagore b’i Nyamagabe bamaze umwaka bategereje uwabatse frw ngo abigire imishinga

Yanditswe na IMVAHO NSHYA

Kuya 2016-08-09 16:09:28

 
Share on:
 
Yasuwe:5
 
Yavuzweho:200
 
10
 
10

Mu murenge wa Kibumbwe mu karere ka Nyamagabe, hari abagore bafite ikibazo cyo kuba barahaye amafaranga umukozi bari bazi ko ari uw’umurenge ngo abigire imishinga bagombaga kujyana muri banki ikabaha amafaranga bagakora bakiteza imbere, none hashize umwaka bategereje imishinga yabo barayihebye.

Amafaranga yatanzwe n’aba bagore ngo yari 2400 kuri buri muntu, buri wese akabwirwa ko agiye kwigirwa umushinga azajyana muri banki ikamuha amafaranga agatangira gukora, nawe ‘agakirigita ifaranga nk’abandi bakire bose’.

Bamwe mu batanze ayo mafaranga baganiriye n’Imvaho Nshya, bagaragaje agahinda gakomeye batewe n’icyoo bita ubutekamutwe bakorewe, ubu umwaka ukaba ushize bagitegereje serivisi bishyuye.

Umwe muri aba bagore yagize ati:“Batubwiraga ko bagiye kudukorera umushinga tukajyana amafaranga bakatwandika muri mudasobwa, bakatwaka nomero y’irangamuntu none twategereje ko baduhamagara twarahebye umwaka urashize.”

PNG - 945.5 kb
Umuntu yabatse amafaranga ngo abigire imishinga bategereza ko ayibazanira baraheba

Igiteye urujijo mu byo aba bagore bavuga, ni uko mu batanze aya mafaranga bose nta n’umwe wabwirwaga umushinga agiye kwigirwa, byose ngo byakorwaga mu cyizere kidafite aho gishingiye.

Ubuyobozi bw’umurenge wa Kibumbwe bwatangarije Imvaho Nshya ko bwatangiye kwakira ibirego by’abagore batandukanye, bavuga kuri iki kibazo.

Zigirubwayo Emmanuel, umunyamabanga nshingwabikorwa w’uyu murenge avuga ko nyuma yo kwakira ibirego bitandukanye bamenye uwakiriye ayo mafaranga, aho basanze ari uwitwa Harerimana Faustin, ubu bakaba bari guperereza ngo bamenye neza uko iki kibazo giteye.

Yagize ati:“Iki kibazo cyangezeho, gusa uwo bahaye aya mafaranga ntabwo ubundi ari umukozi w’umurenge nyir’izina, ahubwo ni umwe mu bakozi babiri baba muri uyu murenge bashinzwe kwigira imishinga abaturage witwa Harerimana Faustin.

Gusa ngo ayo mafaranga bavuga ko ngo aba baturage batanze ari ayo kugura impapuro zo kubigira imishinga, gusa nabyo bibaye ari byo ntibyemewe kuko abo bakozi ntibemerewe kwaka abaturage amafaranga.

Uyu muntu rero arahari ikibazo twarakimenye icyo turi gukora ni ukugikurikirana bwimbitse kandi turabizeza ko kizacyemuka.”

Imvaho Nshya yagerageje yagerageje kuvugisha kuri telefoni ngendanwa uyu muturage bivugwa ko yatse amafaranga abaturage, ntibyakunda.

Kugeza ubu umubare w’abagore batswe amafaranga nturamenyekana neza ndetse n’ingano y’amafaranga batanze ngo bigirwe imishinga ntizwi kuko nta n’inyandiko cyangwa inyemezabwishyu bahawe.

Gusa abaganiriye n’iki kinyamakuru bahamya ko abatanze aya mafaranga ari benshi, dore ko bari babishidukiye bibwira ko ari gahunda ya Leta igamije kubafasha kwikura mu bukene.

atlantis ad

TANGA IGITEKEREZO

 
 
AMATEGEKO AGENGA IYANDIKA RY'IGITEKEREZO CYAWE