2017-12-13 09:46:30 clouds 27o High | Kigali Rwanda

Dukurikire:
 
 

Rwamagana: Imyenda y’abakobwa yafashije abana b’abahungu kurokoka Jenoside

Yanditswe na IMVAHO NSHYA

Kuya 2017-04-25 08:35:24

 
Share on:
 
Yasuwe:78
 
Yavuzweho:200
 
10
 
10

Mu buhamya bwatanzwe na bamwe mu barokokeye Jenoside yakorewe Abatutsi mu bitare bya Rutonde, mu murenge wa Kigabiro mu karere ka Rwamagana, hagaragajwe ko kugira ngo abana b’abahungu babashe kurokoka, bambitswe imyenda y’abakobwa, mu gihe hashakwaga abana b’abahungu ngo bicwe.

JPEG - 345.9 kb
Aha ni ho mu bitare bya Rutonde, aho abicaga batoranyaga abagabo n’abana b’abahungu

Bamwe mu bana b’abahungu bari bahunganye n’ababyeyi babo mu bitare bya Rutonde, bahigwaga n’interahamwe zari zifite umugambi wo kwica abagabo n’abana b’abahungu.

Bamwe mu bashoboye kurokoka baganiriye n’Imvaho Nshya, bavuze bumwe mu buryo ababyeyi babo bakoresheje kugira ngo barokoke.

Mugiraneza Alexis warokotse Jenoside, icyo gihe yari afite imyaka 9, yagize ati “Mu gihe cya Jenoside nari muto ariko hari ibyo nibuka n’ubu bidashobora kunsibangana mu mutwe, mu minsi ya mbere tugeze hano (mu bitare bya Rutonde) Interahamwe zarazaga zikajonjoramo abagabo n’abana b’abahungu, abo iyo bagendaga nta n’umwe wagarukaga.

Icyakurikiyeho ni uko ababyeyi baje kumenya ko hari kwicwa abana b’abahungu n’abagabo, batangira kudushakira imyambaro y’abakobwa, baje kutugenzura basanga mu rugo bamboneye ikanzu banyigisha kwifata nk’umukobwa, Interehamwe zije zincaho ziragenda kuko ntizari zinzi, twageze ubwo batubwira ngo abagore n’abana basubire mu rugo tuve mu bitare nkomeza kwambara imyenda y’abakobwa kugeza ubwo twagiriye amahirwe Inkotanyi zikatugeraho.”

Kagoyire, umwe mu bakobwa na we wemeza ko iyo myenda y’abakobwa yatabaye bamwe mu bana b’abahungu bahigwaga, yagize ati “Iyo wabaga ufite udukanzu nka 3 n’utujipo wabonaga abana baza kugusaba ngo ubatize, nanjye hari uwo nagatije ubu yarakuze ni umugabo arubatse, n’ubwo iwabo bose babishe ariko we yararokotse yavuye hano mu bitare babona ko ari umukobwa.”

Kagoyire akomeza avuga ko hari undi mwana w’umukobwa bari kumwe mu bitare Interahamwe zaje kumushidikanyaho kuko yari ateye nk’umuhungu, agahakana akazitsembera nazo zikanga kwemera nyuma aza gukuramo imyenda arazereka ziramureka.

Mu rwibutso rwubatse mu bitare bya Rutonde, ubu hashyinguyemo imibiri 758 y’Abatutsi bishwe muri Jenoside, bakaba barishwe nyuma y’uko bamaze kurobanuramo Abahutu n’Abatutsi, dore mu minsi ya mbere abari bahahungiye bari bavanze.

atlantis ad

TANGA IGITEKEREZO

 
 
AMATEGEKO AGENGA IYANDIKA RY'IGITEKEREZO CYAWE