2017-05-24 10:43:15 clouds 27o High | Kigali Rwanda

Dukurikire:
 
 

Rusizi: Umugabo w’abana 7 yasanzwe mu bubiko yinigishije inzitiramubu

Yanditswe na Claude Ntawitonda

Kuya 2016-11-14 16:32:13

 
Share on:
 
Yasuwe:4
 
Yavuzweho:200
 
10
 
10

Mazimpaka Edouard w’imyaka 57 wari utuye mu mudugudu wa Runyanzovu, akagari ka Murambi, mu murenge wa Nyakarenzo, bamusanze mu cyumba cye cy’ububiko yapfuye yimanikishije inzitiramubu, hakekwa ko yaba yabitewe n’amashitani.

Aba baturage bashyize mu majwi kuko ngo no mu minsi ishize bamwe mu bana be bafashwe n’ibyo abaturage bise amashitani bamera nk’abataye umutwe baravurwa barakira, bagakeka ko ari byo byakukiye muri se bikamutera kwiyahura.

Mu kiganiro n’Imvaho Nshya, Umunyamabanga Nshingwabikorwa w’uyu murenge
Uwamwiza Jeanne d’Arc, yemeje aya makuru, avuga ko uyu mugabo umugore we yamusize mu rugo mu gitondo agiye mu murima guhinga, undi na we avuga ko agiye kujya mu kazi ke ka buri munsi ko gusoroma icyayi, icyakora ngo atinda mu rugo gato ari kumwe n’umwana we umwe, kuko mu bana 7 asize yabanaga na batatu.

JPEG - 208 kb
Ibiro by’umurenge wa Nyakarenzo nyakwigendera yari atuyemo (Foto Bahuwiyongera S)

Mu ma saa tanu uwo mwana w’umuhungu w’imyaka 18 ajya kwahira ubwatsi bw’amatungo agarutse hafi saa cyenda ahahurira na nyina bagira ngo umugabo na we yageze aho ajya mu kazi, umwana agiye mu cyumba cy’ububiko asanga se yimanitse ku gisenge cy’inzu, yinigishije supaneti ahita atabaza.

Yagize ati “Ni urupfu rwatunguranye cyane kuko nta ndwara izwi yari arwaye, nta kibazo yagiranaga n’umugore cyangwa undi wese wo mu muryango we, twese byatuyobeye.”

Uyu muyobozi yakomeje asobanura ko nyuma y’uru rupfu bahise bakorana inama n’abaturage bongera gusaba buri wese kuba ijisho rya mugenzi we, babona hari ufite ikibazo bakabimenyesha ubuyobozi hakiri kare.

Ibi yabivuze abishingiye ngo ko nk’uwo wiyahuye ngo yahoraga acecetse cyane bakayoberwa impamvu, ibi abaturage na bo bavuga ko yabitewe n’ amashitani bakabyikuramo.

Ikibazo cyo kwiyahura kimaze gufata intera ndende muri aka karere, kuko ibi bibaye bikurikira abandi bamaze iminsi biyahura mu mirenge inyuranye y’aka karere, irimo uwa Rwimbogo, Butare, Gitambi, Gihundwe, Nkanka, n’indi.

Hari na bamwe bagerageje kwiyahura bagiye bakurwa mu mugozi bataranogoka, abaturage bakibaza ikibitera mu gihe rimwe na rimwe uwiyahura baba babona nta bibazo yari asanzwe afite bizwi.

atlantis ad

TANGA IGITEKEREZO

 
 
AMATEGEKO AGENGA IYANDIKA RY'IGITEKEREZO CYAWE