Advertisement
 
 
 
 
 
 
 
 

Amakuru | Mu Ntara

Rusizi: Abayobozi ba SACCO birukanwe bashinjwa kwigwizaho umutungo   

  Yanditswe na BAHUWIYONGERA Sylvestre
 9 April

 
 

Abayobozi ba koperative yo kubitsa no kuguriza y’abahinzi b’icyayi ba Shagasha (SACCO TEA-Shagasha), iherereye mu murenge wa Giheke, mu karere ka Rusizi, birukanwe bazira kwiha inguzanyo mu buryo bw’uburiganya ,ahagaragara inguzanyo za miliyoni zirenga 40 bihaye bitemewe n’amategeko.

Abirukanwe ni uwari umucungamutungo wayo Amani Jean Claude,uwari ushinzwe inguzanyo Ndayishimiye Théogène na perezida w’inama y’ubuyobozi wayo Rugira Jean Nicolas.

Iri yirukanwa ribaye nyuma y’aho ubugenzuzi bw’ikigo cy’igihugu gishinzwe amakoperative(RCA) bwasanze iyi SACCO ifite igihombo cya miliyoni zigeze kuri 20.

JPEG - 122.5 kb
Iyi SACCO yaranyerejwe bitavugwa

Icyo gihombo kiri mu nguzanyo zatanzwe ntizikurikiranwe ngo zigaruzwe, izi ziri muri miliyoni zigeze kuri 70 z’amanyarwanda zatanzwe mu nguzanyo ariko izirenga 40 ubwazo zikikubirwa n’abo bayobozi 3 gusa bigatera akababaro abanyamuryango.

Mu kiganiro n’Imvaho nshya, umuyobozi wungirije w’inama y’ubuyobozi y’iyi sako, Uwase Solange yavuze ko nyuma yo kubona igihombo kidasobanutse iyi sako yaguyemo n’amafaranga yandi aba bayobozi bagiye biha mu buryo bw’uburiganya bahisemo kubahagarika kugira ngo ibyabo bikurikiranwe neza.

Yagize ati’’ Ubu bugenzuzi bwatangiye gukorwa mu kwakira umwaka ushize ahagaragaye ko nka perezida w’inama y’ubuyobozi Rugira Jean Nicolas ushinjwa kwigwizaho umutungo,akoresheje uburiganya yahawe inguzanyo ya miliyoni 12 mu gihe inama y’ubuyobozi yari yemeje ko nta muntu ugomba kurenza inguzanyo ya miliyoni 5, akaba yaraciye ruhinga nyuma akayihabwa n’akanama gashinzwe inguzanyo bidaciye mu mategeko.”

JPEG - 159.3 kb
Visi perezida w’inama y’ubuyobozi y’iyi sako Uwase Solange aravuga ko abanyereje umutungo wayo bose bagomba kuwugarura.

Yakomeje ati” Yatse n’izindi miliyoni 15 azitirira amakoperative 2 yo ku ruhande yayoboraga, ushinzwe inguzanyo na we akaba yarigujije miliyoni 8, hakaba n’izindi 5.200.000 zahawe uriya mukozi ushinzwe isanduku, byose bikaba byaraciye mu buriganya,inyinshi akaba ari bo basinyanaga hagati yabo ko asohoka,tukaba tutagombaga kubyihanganira.’’

Uwase Solange avuga ko nyuma yo gutahura ibi byose, kimwe n’izi nguzanyo zindi za miliyoni zigera kuri 30, zirimo ziriya 20 zibarwa mu gihombo n’izindi 10 zaheze mu bukerererwe, basanze basabwa kwishyura aya mafaranga yose, bitaba ibyo bagashyikirizwa ubutabera.

Uyu muyobozi yanaboneyeho kubeshyuza amakuru yavuzwe ko SACCO Tea Shagasha yaba yarafunze imiryango,avuga ko ikomeje gukora,aba ba Bihemu na bo bakurikiranwa,abanyamuryango bakaba badakwiye kugira impungenge,kuko ibyabo bizagaruzwa vuba.

Bamwe mu banyamuryango baganiriye n’Imvaho Nshya, bavuze ko bifuza ko abanyereje umutungo wabo bakurikiranwa bakawugarura kuko ngo babahemukiye cyane kandi bari babizeye.

Umuyobozi w’aka karere, Harelimana Frédéric, avuga ko batazihanganira abanyereza ibya rubanda ari yo mpamvu aba bose bagomba gukurikiranwa bakagarura uyu mutungo w’abaturage.

 

Comments

Who are you?
Your post
  • To create paragraphs, just leave blank lines.

 
 
Ngoma: Akarere karishyurira ES Mutenderi umwenda wa miliyoni 80
Ngoma: Akarere karishyurira ES Mutenderi umwenda wa miliyoni 80

Ubuyobozi bw’Akarere ka Ngoma buvuga ko bwahawe isomo rikomeye n’ideni ry’amafaranga y’u Rwanda agera kuri miliyoni 80 akarere karimo kwishyurira ishuri ryisumbuye rya Mutenderi (ES Mutenderi), (...)

Karongi: Imirima y’abaturage imaze imyaka 4 yarigaruriwe na rwiyemezamirimo
Karongi: Imirima y’abaturage imaze imyaka 4 yarigaruriwe na rwiyemezamirimo

Bamwe mu baturage bo mu mirenge wa Rugabano na Rubengera mu karere ka Karongi, barasaba ko bahabwa uburenganzira bwo kubyaza umusaruro imirima yabo, kuko kuyegurira rwiyemezamirimo babibonamo (...)

Nyamasheke: Akarere gahangayikishijwe n’ingurane z’abaturage zatinze kuboneka
Nyamasheke: Akarere gahangayikishijwe n’ingurane z’abaturage zatinze kuboneka

Ubuyobozi bw’Akarere ka Nyamasheke buravuga ko buhangayikishijwe n’ikibazo cy’abaturage 324 bafite imitungo yabo yangijwe mu ikorwa ry’umuhanda Nyamasheke-Karongi, magingo aya bakaba batarahabwa (...)

Rwamagana: Hanenzwe ababyeyi bahorana intonganya mu ngo
Rwamagana: Hanenzwe ababyeyi bahorana intonganya mu ngo

Minisitiri w’ubutegetsi bw’igihugu Kaboneka Francis, arasaba abanyarwanda kubungabunga umutekano w’igihugu, ariko ugahera mu ngo zabo, abarara barwana bakabyihana kuko nabyo bibarwa mu bihungabanya (...)

Rusizi: Abapasiteri 21 bageze mu zabukuru bagabiwe inka
Rusizi: Abapasiteri 21 bageze mu zabukuru bagabiwe inka

Itorero Méthodiste Libre mu Rwanda ryagabiye inka abapasiteri 21 bageze mu zabukuru, mu rwego rwo kubafasha kugira amasaziro meza. Ubuyobozi bw’iri torero bwemeza ko ari ubwa mbere gahunda nk’iyi (...)

Advertisement

OPP. MAGERWA, EXPO GROUND, GIKONDO KIGALI, RWANDA PHONE NO : +250-784867952 / 53

© Copyright 2015: Imvaho Nshya. All rights reserved.
Powered by: RPPC.