2017-08-24 09:26:29 clouds 27o High | Kigali Rwanda

Dukurikire:
 
 

Rubavu: Abavutse amashanyarazi abaca hejuru bagiye gusaza batayacanyeho

Yanditswe na IMVAHO NSHYA

Kuya 2016-10-25 09:28:37

 
Share on:
 
Yasuwe:3
 
Yavuzweho:200
 
10
 
10

Abaturage bo mu Murenge wa Mudende mu Kagali ka Ndoranyi bababazwa cyane no kuba abenshi muri bo baravutse basanga amapoto y’amashanyarazi abaca hejuru cyangwa ashinze mu masambu yabo, ariko bakaba bakuze tatabonye ku byiza byo gucanirwa kuko bakiri mu icuraburindi.

Bamwe mu batuye mu mudugudu wa Nyabishongo bavuganye na Imvaho Nshya bemeza ko aya mashyanyarazi amaze igihe kigera ku myaka 40 abegerejwe ariko abaca hejuru yerekeza ahahoze kaminuza y’Abadivantisiti ya Mudende yashinzwe mu mwaka wa 1978.

JPEG - 64.2 kb
Bababazwa no kuba amapoto amaze imyaka igera kuri 40 ajyana amashyanyarazi mu yindi mirenge bo badacana (Foto Iyaremye Y)

Bavuga ko mu myaka bamaze bayoborwa ubuyobozi bw’Akarere ka Rubavu bwagiye bugaruka kuri iki kibazo kenshi ariko ngo nta kirakorwa kugira ngo abo amashanyarazi aca hejuru bayakeneye bayahabwe.

Umwe muri aba baturage bahuje ikibazo yagize ati “Aya mapoto anyura mu mirima yacu yubatswe mu mwaka wa 1975 ajyanye umuriro muri Kaminuza y’Abadivantisiti ya Mudende, ubu isigaye yarimuriwe i Masoro, ariko dutewe agahinda no kuba atunyurira mu mirima imyaka ikirenga tuzonzwe n’agatadowa.”

Aba baturage ntibiyumvisha uburyo bamara imyaka igera kuri 40 amashanyarazi abanyura hejuru akajya gucanira indi Mirenge baturanye nka Bugeshi na Busasamana bo batagira umuriro.

Nsabimana Jean Paul ni uvuga ko yavutse aya mapoto ahari akaba arengeje imyaka 30, ati “Njye navutse mu 1980; nagiye kumenya ubwenge nsanga aya mapoto ahangaha, ariko birababaje kuba iyi myaka yose ishize tukaba tugicana udutodowa.”

Aba baturage bavuga ko iyo basabye ubuyobozi kubarahurira, ngo babasubiza ko nta bushobozi buhari bwo kubaha imashini ifasha kugeza amashanyarazi ku bantu benshi (Transfo), abandi bakemeza ko hari ubwo bigeze kwishira hamwe bagatanga amafaranga nyuma bikananirana bakayasubizwa.

Umunyamabanga nshingwabikorwa wa Mudende Tuyisenge Annonciata, yahamije ko iki kibazo bakizi ndetse hari byinshi bakomeje kugikoraho ngo gikemuke. Yagize ati “Raporo yakozwe mu kwezi kwa Kanama, abaturage bari bemeje ko aho amapoto agera mu ngo zabo ntacyo bazishyuza nk’ingurane kubera icyo abaturage bifuza ubuyobozi buhita bugishyira mu bikorwa.”

Uyu muyobozi yizeye ko iki kibazo gishobora gukemurwa mu ngengo y’imari y’uyu mwaka wa 2016/2017.

atlantis ad

TANGA IGITEKEREZO

 
 
AMATEGEKO AGENGA IYANDIKA RY'IGITEKEREZO CYAWE