2017-07-23 11:30:24 clouds 27o High | Kigali Rwanda

Dukurikire:
 
 

Nyamasheke: Akarere gahangayikishijwe n’ingurane z’abaturage zatinze kuboneka

Yanditswe na IMVAHO NSHYA

Kuya 2016-12-01 13:41:28

 
Share on:
 
Yasuwe:0
 
Yavuzweho:200
 
10
 
10

Ubuyobozi bw’Akarere ka Nyamasheke buravuga ko buhangayikishijwe n’ikibazo cy’abaturage 324 bafite imitungo yabo yangijwe mu ikorwa ry’umuhanda Nyamasheke-Karongi, magingo aya bakaba batarahabwa ingurane kandi umuhanda waramaze kuba nyabagendwa.

Kubaka uyu muhanda byabaye inkuru nziza ku baturage b’utu turere twombi kuko bavuye mu bwingunge bakabasha kugenderana mu buryo bworoshye.

Gusa ku rundi ruhande mu kuwubaka hari imitungo y’abaturage yagiye igongwa n’ibikorwa by’uyu mushinga, harimo n’abafite inzu zasenyutse, ubu bakaba bamaze igihe kinini bakodesha kandi bataranahawe ubwishyu.

Muri uyu muhanda ni ho hangirikiye inzu zabo ariko ngo hashize imyaka itatu bategereje ingurane barahebye.

Umuyobozi w’aka karere, Kamari Aimé Fabien, yavuze ko iki ari kimwe mu bibazo bihangayikishije akarere nk’uko gihangayikishije aba baturage, hakaba harakozwe ibishoboka byose ngo gikurikiranwe, gusa arabizeza ko gishobora gukemuka vuba.

Yagize ati “Ni byo hari abaturage barenga 324 bo mu mirenge ya Kanjongo, Gihombo, Mahembe na Kirimbi bangirijwe ibyabo n’ikorwa ry’umuhanda Nyamasheke-Karongi, n’ubu batarabona ingurane z’ibyabo kandi koko bazirutseho igihe kirekire.

Gusa habayemo ibibazo binyuranye, aho bamwe muri bo batatanze ibyangombwa byabo by’ubutaka, hakaba abataragiraga indangamuntu mu gihe cyo kubabarura kubera impamvu zinyuranye, abagiye batanga nimero za konti zitari zo, ugasanga umugabo atanze iz’umugore cyangwa umugore atanze iz’umugabo, amafaranga ntahure n’aya buri muntu bigasubira inyuma, n’ibindi bibazo byabayemo byatumye batayabonera igihe.”

Avuga ko uretse aba bo muri iyi mirenge hari n’abandi bake b’imirenge ya Bushekeri na Kagano na bo basigaye batayabonye igihe abandi bayabonaga, na bo aho bamenyekaniye bikaba bikurikiranirwa hamwe.

Dosiye z’abo bose ngo zikaba zaragejejwe ku kigo cy’igihugu cy’imihanda (RTDA) na cyo kimaze kuyabarura kuko babikoreye hamwe n’abo baturage banabisinyira hamwe, babijyana muri MINECOFIN, hakaba hasigaye ko amafaranga asohoka.

Yagize ati “Aho mperukira kuvugana n’ababishinzwe muri RTDA bambwiye ko dosiye barimo barazirangiza bazerekeza muri MINECOFIN, ubu ndizera ko bishobora kuba byaragezeyo kandi bigenze neza byose amafaranga yahita asohoka, ku buryo bitagombye kurenga impera z’uyu mwaka batayabonye. Nkaba nabizeza ko nta gihindutse banayakoresha mu minsi mikuru ya Noheli n’ubunani no mu myiteguro y’itangira ry’amashuri ry’abana babo umwaka utaha.”

Nyuma yo kumva ibivugwa n’uyu muyobozi, bamwe muri aba baturage bamusabye gukomeza kubikurikirana ntabaheze ku cyizere, kuko imyaka igiye kurenga itatu amaso yaraheze mu kirere kandi barakomeje kwizezwa kuyahabwa vuba.

TANGA IGITEKEREZO

 
 
AMATEGEKO AGENGA IYANDIKA RY'IGITEKEREZO CYAWE