Advertisement
 
 
 
 
 
 
 
 

Amakuru | Mu Ntara

Nyamasheke: Abagabo badukanye kugurisha imitungo y’ingo rwihishwa   

  Yanditswe na BAHUWIYONGERA SYLVESTRE
 4 months ago

 
 

Bamwe mu bagore bo mu karere ka Rusizi bahangayikishijwe bikomeye n’abagabo babo basigaye babaca ruhinga bakagurisha imitungo yiganjemo amasambu rwihishwa.

Abagore baganiriye n’Imvaho Nshya bagaragaje ko hari ubwo abagabo babo bagurisha imitungo y’urugo, bakazashiduka babwirwa ko iyo mitungo yagurishijwe.

Iki kibazo gikomeje guhangayikisha cyane abagore benshi mu murenge wa Nyabitekeri, mu karere ka Nyamasheke, bagifata nk’ihohoterwa rikomeye bagirirwa, bagasaba ubuyobozi bw’uyu murenge guhagurukira iyi ngeso mbi ishobora gukurura amakimbirane ashobora kugezano ku rupfu.

Ubwo Imvaho Nshya yageraga muri uyu murenge yahasanze abagore benshi bafite iki kibazo, abagabo na bo bakemeza ko gihari kandi gifite ubukana bukomeye.

Aba bavuga ko iki kibazo giterwa n’abagabo bamwe baba barataye ingo zabo, bagahindukira bakagurisha n’imitungo rwihishwa bakayisangira n’inshoreke, abagore b’isezerano batabizi kandi ari bo banabitse ibyangombwa by’ubutaka.

Hari bamwe mu bagore babimenya ngo bikaba imanza, bagatangira gusabwa kwishyura ayo mafaranga ngo basubizwe ibyabo cyangwa baterezwe cyamunara batazi igihe byagurishirijwe.

Mukamana Odile (amazina yahinduwe), utuye mu mudugudu wa Gikombe mu kagari ka Muyange, ni umwe mu bagore bahuye n’izi ngorane zikomeye.

Mu buhamya bwe avuga ko umugabo yagurishije isambu atabizi kandi barasezeranye byemewe n’amategeko ari na we ubitse icyangombwa cy’ubutaka, umugabo yigira mu mujyi wa Kigali undi agiye guca igiti mu ishyamba atungurwa no kubwirwa ko ishyamba acamo igiti atari irye biramuyobera.

Yagize ati “Umugabo twari dufitanye abana 7 afatamo bamwe arabashuka ngo nibagurisha azayabashyirira kuri SACCO bacuruze, abandi batabizi. Umwe mu bana yansinyiye ko nanjye mbyemeye, nagiye kwisanga mbwirwa n’abantu ntazi ko ntagomba kongera gukandagiza ikirenge mu ishyamba ryanjye biranyobera. Ikindi bakoze ni uko bagurishije amafaranga make bandika menshi ngo nimburana uwaguze azayanyishyuze nyabure kandi ni ko biri kugenda n’ubu ndacyayirukaho, ndayikubitirwaho, mbese nta mahoro mfite.”

Mugenzi we Mutesi Claudine (nawe amazina yahinduwe) utuye mu kagari ka Gikombe na we yagize ati “Umugabo dufitanye abana 9 yarabantanye ariko nagiye kumva numva ngo isambu yanyingigaga ngo tuyigurishe milyoni 3 nkamutsembera, yaragurishijwe mbimenya hashize amezi 2.

Nabonye abana bagiye kumfana nyigumamo ku ngufu none uwaguze arantera hejuru ngo nimwishyure amafaranga ye ntazi n’ayo yaguzwe, baravuga ko bazayiteza cyamunara ngasohokamo kandi sinzi igihe yagurishirijwe, abasinye n’aho byabereye.Abagore bo muri Nyabitekeri turahangayitse rwose Leta nidutabare.”

Pasiteri Nzeyimana Jean Damascène, utuye muri uyu murenge avuga ko iyi ngeso igenda ikura kandi iteza amakimbirane mu miryango, igaterwa n’abagabo bata abagore bakagurisha rwihishwa bakayajyana mu bagore bandi bakayatsemba.

Avuga ko hari aho usanga umugore yasigaranye n’abana ahangayikana, akabona bikwiye guhagarara hataragira abica abo bashakanye nk’uko babyumva ahandi.

Umunyamabanga nshingwabikorwa w’uyu murenge Uwimana Damas, avuga ko uwagurishije rwihishwa umutungo w’urugo akwiye kwihombera, yizeza kubikurikirana abagore babirenganiyemo bose bakarenganurwa.

 

Comments

 
 
Hamuritswe igishushanyombonera cy’umujyi wa Bugarama
Hamuritswe igishushanyombonera cy’umujyi wa Bugarama

Mu gihe kiri imbere igice kinini cy’umurenge wa Bugarama kigiye kuba umujyi wunganira umujyi wa Rusizi, igishushanyombonera cyawo kikaba cyaramurukiwe abatekinisiye b’akarere n’ubuyobozi bw’uyu (...)

Rusizi:Abaturage bafashe ingamba zo kwicungira umutekano
Rusizi:Abaturage bafashe ingamba zo kwicungira umutekano

Nyuma y’aho mu rukerera rwo ku wa 12 uku kwezi abantu bataramenyekana bateye mu kagari ka Ryankana mu murenge wa Bugarama bakaharasira abaturage 3 babiri bagahita bahasiga ubuzima, abaturage b’uyu (...)

Guverineri Mureshyankwano yasabye urubyiruko kwirinda ibiyobyabwenge
Guverineri Mureshyankwano yasabye urubyiruko kwirinda ibiyobyabwenge

Ubwo hizihizwaga umunsi ngarukamwaka witiriwe Mutagatifu Yozefu, Guverineri w’Intara y’Amajyepfo Mureshyankwano Marie Rose yasabye abanyeshuri biga mu rwunge rw’amashuri rwitiriwe Mutagatifu Yozefu (...)

Gakenke-Muyongwe: Kubona ‘rezo’ ya telefone biracyari ingorabahizi
Gakenke-Muyongwe: Kubona ‘rezo’ ya telefone biracyari ingorabahizi

Abaturage bo mu murenge wa Muyongwe mu karere ka Gakenke, bavuga ko bababajwe no kuba burira imisozi bajya gushaka ihuzanzira (rezo) rya telefone ngendanwa, bagasaba ubuyobozi kubafasha gukemura (...)

Ngoma:Batewe impungenge n’igiciro cy’amakara cyazamutse cyane
Ngoma:Batewe impungenge n’igiciro cy’amakara cyazamutse cyane

Bamwe mu batuye umujyi wa Ngoma, mu ntara y’Uburasirazuba, baravuga ko bakomerewe n’ikibazo cy’ibura ry’amakara yo gutekesha, n’aho bayabona bakayabona ku giciro bavuga ko gihanitse bagereranyije (...)

Advertisement

OPP. MAGERWA, EXPO GROUND, GIKONDO KIGALI, RWANDA PHONE NO : +250-784867952 / 53

© Copyright 2015: Imvaho Nshya. All rights reserved.
Powered by: RPPC.