2017-10-17 06:58:11 clouds 27o High | Kigali Rwanda

Dukurikire:
 
 

Nyabihu:Abagore barasabwa kuva mu gikari, bakabyaza umusaruro amahirwe abazengurutse

Yanditswe na IMVAHO NSHYA

Kuya 2017-04-25 09:07:42

 
Share on:
 
Yasuwe:130
 
Yavuzweho:200
 
10
 
10

Bamwe mu bagore bo mu karere ka Nyabihu bitabiriye kujya mu makoperative, bavuga ko yabafashije kuzamura imyumvire yabo mu iterambere, ndetse n’amakimbirane yo mu miryango akagabanuka.

JPEG - 289.1 kb
Bamwe mu bagize Koperative COIVARU bamurika ibyo bakora muri koperative yabo

Aba bagore basaba bagenzi babo kutaguma mu bikoni no mu bikari, ngo bategere ko abagabo babo ari bo bahihibikanira iterambere ry’urugo.

Abagore bagera kuri 30 bo mu murenge wa Rugera, bibumbiye muri koperative COIVARU, kuri ubu bakora ibikoresho bitandukanye by’ubukorikori bahereye ku mahembe y’inka, bemeza ko nibura buri munyamuryango yinjiza amafaranga ibihumbi 250 buri kwezi.

Nyiransengiyumva Jeannne, yagize ati “Ntarajya muri koperative ngo nifatanye n’abandi, njye aho abandi bagore bari, mu buzima bwanjye nari umuntu ugayitse cyane, ibyangombwa byose by’urugo byarebaga umugabo, mu rugo ntitwashoboraga kurya tutabanje guca inshuro.

Iyi koperative rero yampinduriye ubuzima; ubu maze kwiyuzuriza inzu imeze neza impesha agaciro n’ab’iwanjye ifite nibura agaciro ka miliyoni 3.5, iwanjye mpafite inka ebyiri kandi na mituweli nta bwo bikiri ngombwa ko ndaranya muri Gicurasi buri mwaka mba ndangije kwishyurira umuryango wanjye ntiriwe ntegereza umugabo.
Umugore ukibereye mu gikari ngo ategeye amaboko umugabo we kuri iki gihe tugezemo ariho nabi kandi aravunika, ahubwo nashake koperative we na bagenzi be biteze imbere”.

Nyirarwangano Daphrose, umunyamuryango w’iyi koperative, na we yagize ati “Ku myaka 63 y’amavuko mfite nta bwo nari nzi akamaro ka koperative, ntarayitabirira nta mahoro wasangaga iwanjye kubera ubukene kuri buri kantu kose, ngayo amakimbirane n’intonganya by’urudaca bya buri munsi, ariko aho mariye kwinjira muri COIVARU, ubu maze kwigurira inka, iyo ugeze iwanjye uyisanga mu kiraro cya kijyambere, nkama amata abana bakayanywa asigaye nkayagurisha bakampa amafaranga yo kwikenuza.

Ndakubwira ko nta kintu na kimwe dushobora gukenera mu muryango wacu ngo tubure uburyo bwo kukigeraho, iyo twakoze neza tukagabana nibura mbona amafaranga atari munsi y’ibihumbi 250 ku kwezi nkura muri koperative.”

Umuyobozi w’akarere ka Nyabihu Uwanzwenuwe Theoneste, yagize ati“ Abagore bibumbiye muri koperative COIVARU bo mu murenge wa Rugera, uretse no kuba mu by’ukuri usanga bariteje imbere muri byinshi, kuri ubu ni abantu mu karere twemeza ko banatanga imirimo, kuko urabyumva nta koperative ibura ba nyakabyizi, ni ibintu rero twishimira kandi nshishikariza buri mugore wese kugira koperative abarizwamo.

Aba bagore kandi ni intangarugero mu mibanire n’abo bashakanye kuko ubu nibo bagira inama bagenzi babo uburyo bwiza bwo gukemura amakimbirane mu ngo, kuko bo iki kibazo bakiboneye umuti kera, amakoperative ajijura abayagana”.

Gusa na none aba bagore ntibabura kuvuga ko ibyo bagenda bageraho byose babikesha imiyoborere myiza y’igihugu cyabo, kuko ngo yabasubije uburenganzira bwabo, igatuma bakora cyane kandi bihesha agaciro.

atlantis ad

TANGA IGITEKEREZO

 
 
AMATEGEKO AGENGA IYANDIKA RY'IGITEKEREZO CYAWE