2017-06-28 15:02:12 clouds 27o High | Kigali Rwanda

Dukurikire:
 
 

Musanze: Umusaza w’imyaka 64 yashimiwe ko yarokoye Abatutsi 300 muri Jenoside

Yanditswe na Amani

Kuya 2017-04-26 07:39:55

 
Share on:
 
Yasuwe:181
 
Yavuzweho:200
 
10
 
10

Umusaza w’imyaka 64 witwa Ndibabaje Assiel Katarya, wo mu kagari ka Kampanga, umurenge wa Kinigi, mu karere ka Musanze, yagizwe umurinzi w’igihango, ashimirwa kuba yararokoye Abatutsi bagera kuri 300, ndetse bikaviramo abana be 2 kwicwa.

JPEG - 396.1 kb
Ndibabaje Assiel Katarya warokoye abatutsi 300 mu gihe cya Jenoside (Foto Ngaboyabahizi P)

Uyu musaza mu gihe cya Jenoside yakorewe Abatutsi mu 1994 ntiyahigwaga, ariko ngo yakoresheje uko ashoboye ngo abashe kugira Abatutsi arokora, ndetse ku bw’amahirwe arokora abagera kuri 300, igikorwa yemeza ko yumva kimuteye ishema.

Uyu musaza avuga ko mu gihe cya Jenoside yari umuyobozi w’akagari, mu cyahoze ari komini Mukinga (kuri ubu ni muri Musanze), ndetse akaba na none yari umukirisitu ukuriye abandi mu itorero ry’abadiventisiti b’umunsi wa 7.

Yagize ati “Hano muri Jenoside ibintu byari bikaze, intero yari iyo gutsembatsemba Umututsi n’abamukomokaho, gusa mu bubasha buto nari mfite nk’umuyobozi wa serire, nagerageje guhungishiriza Abatutsi mu rusengero.

Ntibyari byoroshye, kuko yaba Burugumesitiri, yemwe n’abo tuva inda imwe bose umugambi wari umwe wo gukuraho icyitwa Umututsi, ngo k’uburyo abazavuka bazibaza uko yari ateye.

Yakomeje agira ati “Nakoze igikorwa cyiza nshaka ijuru kuko numvaga ko buri muntu wese yaremwe mu ishusho y’Imana, none ubu ndi mu rwego rw’abarinzi b’igihango, ni igikorwa cy’indashyikirwa ku gihugu cyanjye n’umuryango nyarwanda, n’ubwo nabahishe interahamwe zikanyicira abana 2, ariko nibura abandi bararokotse ndababona.

Ubu, baramfasha ibyo abana banjye bagombaga gukora abo narokoye barabikora, kandi nabo babuze ababo, icyiza ni urukundo mu banyarwanda.”
Uyu musaza avuga ko ngo nanone iyo ingabo za FPR-Inkotanyi zitaba hafi aho icyo gihe, nta n’umwe wari kurokoka mu gihe cy’amezi 2 bari bamazemo batungwa n’ibiryo bike yabashyiraga.

Ku ruhande rw’abaturage bahishwe na Katarya, bavuga ko iyo haza kubaho abantu bafite umutima nk’uw’uyu mugabo, hatari kwicwa Abatutsi benshi mu gihe cya Jenoside yakorewe Abatutsi nk’uko byagenze.

Kanzinya Enias, ufite imyaka 70 akaba umwe mu barokowe na Ndibabaje Katarya, yagize ati “Iyo Ndibabaje uyu atagira uruhare mu kuturokora ntituba tukivuga kuri aya magingo ni ukuri ijana ku ijana, yaradufashije pe! Hamwe n’imiryango yacu turamushimira cyane, muri rusange iyo haboneka ba Ndibabaje nibura batatu Abatutsi bapfuye bari kugabanuka, twabuze uko tumugororera, mbese byaraturenze, kuko ni we mu bitwaga Abahutu wabashaga gukingira ikibaba Umututsi.”

Rwasibo Jean Pierre ukuriye umuryango uharanira inyungu z’abarokotse Jenoside yakorewe Abatutsi, Ibuka, mu Karere ka Musanze, yagize ati “Ndashima ubutwari n’ubwitange bw’uyu Katarya witanze kugera ubwo nawe yicirwa abana 2, mu gihe kandi bo batahigwaga…rwose iki ni igikorwa cy’ubutwari.”

Katarya kuri ubu ni umurinzi w’igihango ukuriye abo mu murenge wa Kinigi avukamo.

atlantis ad

TANGA IGITEKEREZO

 
 
AMATEGEKO AGENGA IYANDIKA RY'IGITEKEREZO CYAWE