2017-07-22 13:49:51 clouds 27o High | Kigali Rwanda

Dukurikire:
 
 

Kirehe:Abahinzi b’umuceri basaga 3 500 biyemeje korozanya inka

Yanditswe na IMVAHO NSHYA

Kuya 2016-08-31 13:14:15

 
Share on:
 
Yasuwe:10
 
Yavuzweho:200
 
10
 
10

Ubuyobozi bwa Koperative COOPRIKI-Cyunuzi ihinga umuceri mu gishanga gihuriweho n’uturere twa Ngoma na Kirehe, buratangaza ko bwatangije gahunda yo kugabirana inka, mu myaka igera 3 zikaba zimaze guhabwa abasaga 30, intego ikaba ari uko buri munyamuryango yoroza mugenzi we kugeza igihe bose bazagererwaho.

Koperative COOPRIKI igizwe n’abanyamuryango bagera ku 3,583, ikaba ikorera ubuhinzi bw’umuceri wo mu bwoko bwa kigori kuri hegitari zisaga 500 mu gishanga cya Cyunuzi.

Mu kiganiro n’Imvaho Nshya, umuyobozi w’iyi Koperative Maniraguha Patrick, yatangaje ko batangiye gahunda yo kurozanya inka mu banyamuryango, hagamijwe ko buri munyamuryango wa koperative yabo atunga inka, ikamufasha kubona amata ndetse n’ifumbire imufasha kongera umusaruro uva ku buhinzi.

JPEG - 202 kb
Abahinzi b’umuceri bemeza ko inka borojwe zunganira ubuhinzi bwabo (Foto Manishimwe N)

Asobanura ko zitangwa hagendewe ku bushobozi bw’imiryango y’abagize iyi koperative, abasanzwe batoroye akaba ari bo baherwaho ariko intego ikaba ari uko buri wese yarora inka, bityo n’ubuhinzi bakora bukajya bwunganirwa no kunywa amata, kandi hakanaboneka ifumbire y’imborera nziza ituma umuceri bahinga uba wujuje ubuziranenge.

Maniraguha avuga ko iyi gahunda ya Girinka muhinzi w’umuceri bayitangiye bahereye ku nka zirindwi bahawe n’umushinga RCCP, none ubu ngo zimaze kugera kuri benshi.

Yagize ati “Mu rwego rwo kugira ubuzima bwiza ubu dufite gahunda yo koroza buri munyamuryango inka, ni umuco mwiza dukomora kuri Nyakubahwa Perezida wa Repubulika, wifuza ko buri munyarwanda anywa amata, kandi akabona ifumbire.

Natwe rero ku nkunga y’umushinga wa RCCP abanyamuryango b’iyi Kopertaive ihinga umuceri ubu baragerwaho na gahunda ya Girinka, aho uyu mushinga watangiye utanga inka zirindwi, zikaba zigenda zororoka ari nako borozanya zikaba zimaze kugera ku barenga 30.”

Abanyamuryango ba COOPRIKI nubwo ari benshi, abaganiriye n’Imvaho Nshya bagaragaje ko iyi gahunda yo korozanya inka bayitezeho byinshi, kuko hari abatarabashaga kubona ifumbire ihagije bakoresha mu buhinzi bwabo.

Bagaragaza ko mu gihe buri wese azaba yoroye inka bazajya banywa amata kandi bakabasha kubona n’ifumbire nziza, bakemeza ko n’ubuhinzi bw’umuceri bakora buzazamura umusaruro babonaga.

Umwe mu banyamuryango yagize ati “Ubu dufite inka, buri munyamuryango baramworoza, zatangiye ari 7, ubu rero izo nka uko zibyaye natwe buri muntu agenda yoroza mugenzi we, gutyo gutyo.”

Annonciata Mukankwira, umuhinzi w’umuceri wo mu murenge wa Mushikiri, avuga ko nibagerwaho n’izi nka ari benshi, ngo n’umusaruro w’ubuhinzi bakora ushobora kwiyongera.

Yagize ati “Ni gahunda tubona ari nziza kuko uretse no kuba tuzabasha kunywa amata, n’ubuhinzi dukora buzatera imbere, ifumbire izaboneka nyinshi, bitume n’umusaroro umuntu yashoboraga kubona mu buso ahingaho wiyongera.”

Koperative COOPRIKI-Cyunuzi ihinga umuceri yatangiye mu mwaka wa 2006, ku buso bungana na hegitari 528, yezaho toni zisaga ibihumbi 2 ku gihembwe kimwe cy’ihinga.

TANGA IGITEKEREZO

 
 
AMATEGEKO AGENGA IYANDIKA RY'IGITEKEREZO CYAWE