Advertisement
 
 
 
 
 
 
 
 

Amakuru | Mu Ntara

Gicumbi: Yasabye akazi inshuro 137, birangira yihangiye umurimo winjiza 300 000   

  Yanditswe na NGABOYABAHIZI PROTAIS
 2 months ago

 
 

Kemerwa Andrew, umunyabugeni wo mu murenge wa Byumba mu karere ka Gicumbi ho mu ntara y’Amajyaruguru, yemeza ko yatejwe imbere n’umwuga w’ubukorikori yihangiye, nyuma yo kwandika amabaruwa menshi asaba akazi, ariko ntihagire na hamwe agahabwa.

Avuga ko nyuma yo kurangiza amashuri yisumbuye mu ishuri ry’ubugeni rya Nyundo ngo yanze guheranwa no kwandika amabaruwa asaba akazi yita ‘jeroneri’ (j’ai l’honneur), kuko ngo agera ku 137 yari amaze kwandika ntacyo yamumariye.

Nyuma yo kurambirwa gusaba akazi, yihangiye umurimo wo kubaza amashusho mu biti, none ubu arinjiza amafaranga asaga ibihumbi 300 buri kwezi.

Uyu munyabugeni ubaza amashusho mu biti ndetse n’andi akora mu mpapuro ngo asanga umuntu wese akwiye kwiga ashyizeho umwete kandi agaharanira kwihangira umurimo, kuko gusaba akazi yamaze kubona ko bihira bake.

JPEG - 570.1 kb
Kemerwa ahamya ko ibi bihangano bye bimwinjiriza asaga ibihumbi 300 buri kwezi (Foto Ngaboyabahizi P)

Yagize ati “Nyuma yo kurangiza amashuri yisumbuye, nasabye akazi ahantu henshi nasabye kuba umurezi ngo imyanya ntayo, najya mu nganda ngo nta bishushanyo bazakenera, najya mu bihayimana ngo bafite abasanzwe bababumbira amashusho, urumva ko rwose ibyo byari mu bintu bipfobya ibyo nize kandi bikansha intege. Nari maze kwandika amabaruwa 137, nta n’umwe unyemerera akazi, natekereje rero ko mu byo nize harimo gukoresha amaboko yanjye, ibiti byari bihari hafi yanjye, ibarizo ryari rihari ripfa ubusa mu mazu y’imyuga, ntekereza guhera kuri ibyo maze ntangira gukora amashusho”.

Kemerwa avuga ko uretse no kuba ngo yarasabaga akazi yandika amabaruwa, ngo no kujya gusaba akazi mu ngendo yahuraga n’ingorane nyinshi.

Yagize ati “Naburaga isabune yo kumesa hakaba ubwo nagera ku kigo runaka bakandeba intambuko n’imyambarire ntibambonemo umuntu, naburaga ifunguro muri izo ngendo kuko hari ubwo navaga i Gicumbi nkishora i Nyagatare n’amaguru. Urumva na we urugendo rutagira ifunguro, abo nasabaga isabune n’amatike bari bamaze kunyinuba”.

Uyu munyabugeni ngo yatangije amafaranga 1600, aya mafaranga ngo yayaguzemo akarange gake, umuseno, n’uburoso maze atangirira ku ibuye bita urugarika akuramo ifoto y’umunyemari atashatse kuvuga amazina, maze amwishyura amafaranga ibihumbi 180.

Aya mafaranga rero ngo ni yo yahereyeho ariyubaka, ngo kuva mu mwaka wa 2000, uyu mugabo yakoze ingendo shuri nyinshi aho yagiye Zambiya, Kenya n’ahandi abikesha umwuga w’ubuhanzi mu bugeni.

Nubwo avuga ku iterambere amaze kugeraho, ku rundi ruhande ngo haracyari ingorane zo kuba ibihangano bye bigurwa n’abize gusa kimwe n’abanyamahanga.

Uyu mwuga we avuga ko utarushya kandi udahenze kuko akoresha bimwe mu bikoresho bamwe bafata nk’ibikwiye gutabwa, nk’ibarizo amabuye, ibikarito n’ibindi, akaba asaba ababishaka kuza akabigisha ngo kuko kuri we abona uyu mwuga abawiga ari bake kandi ufite amafaranga, aho umuntu yandika icyapa umunsi umwe agatahana arenga 70,000.

Kemerwa uyu murimo yihangiye yemeza ko yawukuyemo ikibanza mu mujyi wa Byumba gifite agaciro karenga amafaranga miliyoni 12, amafaranga yakuyemo kandi ngo yamufashije gukora ubukwe ndetse ukaba umutunganye n’umuryango we kugeza ubu.

Mu kiganiro kirambuye yagiranye n’Imvaho Nshya, Karemera yaboneyeho umwanya wo gukebura bamwe mu rubyiruko barangiza amashuri bagahora basiragira ngo barashakisha akazi, bakabura bakandavura, abibutsa ko ubwenge n’imbaraga Imana yabahaye bakwiye kubibyaza umusaruro bikorera, aho guhora bahanze amaso Leta cyangwa abandi bihangiye imirimo ngo babahe akazi.

 

Comments

 
 
Nyamasheke:Umwana w’imyaka 7 yagwiriwe n’igiti arapfa, uwagitemaga atabwa muri yombi
Nyamasheke:Umwana w’imyaka 7 yagwiriwe n’igiti arapfa, uwagitemaga atabwa muri yombi

Iradukunda Chantal w’imyaka irindwi y’amavuko yagwiriwe n’igiti cyatemwaga arapfa, ubwo yatambukaga hafi yacyo arimo gutashya inkwi na bagenzi be. Nk’uko Imvaho Nshya yabitangarijwe n’umunyamabanga (...)

Nyanza:Bakeneye isoko ryagutse ry’urusenda bejeje ku bwinshi
Nyanza:Bakeneye isoko ryagutse ry’urusenda bejeje ku bwinshi

Nyuma y’aho batangiriye gukora ubuhinzi bw’urusenda ku butaka buhuje kandi bakaba bari kubona umusaruro mwinshi, abahinzi bo mu murenge wa Nyagisozi na Rwabicuma mu karere ka Nyanza, basanga ubu (...)

Rubavu:Bamwe mu baturage banenzwe kugurisha ibyo bejeje byose ntibisigire ibyo barya
Rubavu:Bamwe mu baturage banenzwe kugurisha ibyo bejeje byose ntibisigire ibyo barya

Ubuyobozi bw’akarere ka Rubavu burasaba abaturage kwiga guhunika imyaka bejeje, bakirinda umuco ugaragara kuri bamwe bagurisha ibyo bejeje byose ntibanibuke kwisigira ibyo nabo bazarya. Ubu (...)

Rusizi: Abaturage bajujubijwe n’inkende zibangiriza imyaka
Rusizi: Abaturage bajujubijwe n’inkende zibangiriza imyaka

Abaturage bo mu tugari 5 tugize umurenge wa Mururu, mu karere ka Rusizi, baravuga ko nta kintu bagihinga ngo beze kubera ko ibyo bahinze hafi ya byose inkende zibyona. Ikibazo nk’uko babyivugira (...)

Abaturage b’i Nyabihu bakomerewe b’igiciro cy’inkwi gikomeje kuzamuka
Abaturage b’i Nyabihu bakomerewe b’igiciro cy’inkwi gikomeje kuzamuka

Abaturage bo mu karere ka Nyabihu baratangaza ko izamuka ry’ibiciro by’ibicanwa bikomoka ku biti ari inzitizi ikomereye abenshi mu batishoboye. Bavuga ko ngo nta mashyamba ahari bashobora kubonamo (...)

Advertisement

OPP. MAGERWA, EXPO GROUND, GIKONDO KIGALI, RWANDA PHONE NO : +250-784867952 / 53

© Copyright 2015: Imvaho Nshya. All rights reserved.
Powered by: RPPC.