2017-06-24 09:49:51 clouds 27o High | Kigali Rwanda

Dukurikire:
 
 

Gicumbi:Kwigisha urubyiruko amateka ya Jenoside bizabafasha guhangana n’abayipfobya

Yanditswe na Amani

Kuya 2017-04-26 07:45:41

 
Share on:
 
Yasuwe:52
 
Yavuzweho:200
 
10
 
10

Ubuyobozi bw’akarere ka Gicumbi n’abahatuye basabye ko amateka ya Jenoside yakorewe Abatutsi yarushaho kwigishwa urubyiruko, kugira ngo barusheho kuyamenya, abafashe guhangana n’abapfobya bakanahakana Jenoside yakorewe abatutsi.

JPEG - 362 kb
Basabye ko urubyiruko rwigishwa amateka, akarufasha gukumira ingengabitekerezo ya Jenoside

Mu muhango wo kwibuka ku nshuro ya 23 abatutsi biciwe mu murenge wa Mutete muri aka karere, bashyinguwe mu rwibutso rwa Jenoside rwa Mutete, hifujwe ko amateka ya Jenoside yarushaho kwigishwa, kugira ngo atazibagirana.

Nk’uko abatangabuhamya barokokeye mu Murenge wa Mutete babigaragaje, ngo muri aka gace haranzwe n’ubugome bukabije mu gihe cya Jenoside, aho wasangaga abicanyi badatoranya umwana cyangwa umukuru, ahubwo icyo barebaga ngo ni ukuba umuntu ari Umututsi gusa.

Nyirabeza Cecile, umwe mu barokokeye muri uyu Murenge, yagize ati “Nababajwe cyane no kubona batema mu gikanu Data wambyaye, gusa yapfuye hashize iminsi ibiri, ndetse na Mama baramwishe ariko ku bw’amahirwe nta bwo nabibonye n’amaso yanjye, kandi ababikoze harimo urubyiruko cyane cyane.”

Nyirabeza yongeyeho ko mu rwego rwo gukumira ko Jensoide yakongera kuba mu Rwanda, asanga hakwiye gushyirwa imbaraga mu kwigisha urubyiruko, kuko ari rwo ahanini rwashyize mu bikorwa Jenoside yakorewe abatutsi, nyuma y’igihe kirekire rutozwa amacakubiri n’inzangano.

Umuyobozi w’Akarere ka Gicumbi Mudaheranwa Juvenal, na we yashimangiye ko amateka yaranze umurenge wa Mutete akwiye kwigishwa urubyiruko rwo muri uyu murenge, kugira ngo azarufashe gukumira icyo ari cyo cyose cyashaka kugarura Jenoside.

Yagize ati “Uyu murenge ni umwe ufite amateka ya Jenoside mu karere ka Gicumbi, nta bwo ayo mateka twayaharira abahatuye gusa ahubwo ni ay’Abanyarwanda muri rusange, buri wese kandi asabwe kumenya aya mateka, kuko byongerera imbaraga abaharokokeye mu rwego rwo kurushaho kuzirikana abishwe muri uyu murenge mu mwaka wa 1994, barushaho kwibuka no kubungabunga ibimaze kugerwaho nyuma ya Jenoside yakorewe abatutsi.”

Ikindi bagarutseho, ni ukurushaho kubungabunga urwibutso rwa Mutete nk’amwe mu mateka agomba kubafasha guhindura imyumvire no gukumira ingengabitekerezo ya Jenoside.

Bamwe mu basore n’inkumi bo muri uyu murenge baganiriye n’Imvaho Nshya bagaragaje ko Jenoside yakorewe Abatutsi yateguwe igihe kirekire ndetse by’umwihariko urubyiruko rugatozwa amacakubiri n’inzangano, bo ubu bakaba barafashe ingamba zo gukumira ingengabitekerezo ya Jenoside, ahubwo bagaharanira kugira igihugu kizira amacakubiri, ahubwo kirangwamo iterambere ryubakiye ku bumwe n’urukundo.

atlantis ad

TANGA IGITEKEREZO

 
 
AMATEGEKO AGENGA IYANDIKA RY'IGITEKEREZO CYAWE