2017-08-21 15:16:56 clouds 27o High | Kigali Rwanda

Dukurikire:
 
 

Gatsibo: Barinubira umukino w’"Akazungu" ugiye kubamaraho imitungo

Yanditswe na IMVAHO NSHYA

Kuya 2016-11-27 08:40:22

 
Share on:
 
Yasuwe:3
 
Yavuzweho:200
 
10
 
10

Bamwe mu baturage batuye mu murenge wa Kiziguro wo mu karere ka Gatsibo barinubira umukino wiswe "Akazungu" usigaye waradukanwe na rumwe mu rubyiruko rwirirwa ku mihanda, aho bemeza ko uyu mukino abashukwa kuwukina bose birangira ibyabo biyoyotse.

Uyu mukino bise "Akazungu" ni umwe mu mikino y’amahirwe bigoranye gukoresha ubwenge no gushishoza bisanzwe nkuko bamwe mu baturage babyemeza.

Muri Santeri ya Kiramuruzi ikorerwamo ibikorwa by’ubucuruzi bitandukanye niho Imvaho Nshya yasanze abakina uyu mukino bashagawe cyane n’abandi bareba uko ukinwa.

Abaturage batangaje ko uyu mukino ugiye kubamaraho utwabo dore ko y’aba abana n’abakuze usanga bose badakumirwa na ba nyir’umukino w’akazungu kuwukina. Mu buhamya bwa bamwe mubakinnye "Akazungu" bemeza ko nta munsi n’umwe bigeze bagira amahirwe yo gutsinda.

JPEG - 297.1 kb
Abakinnye Akazungubemeza ko karimo uburiganya, bagasaba ko wahagurukirwa ugacibwa burundu

Ngirinshuti Valence na Hakizimana Jean Marie Vianney bavuga ko nabo bakinnye uyu mukino kuva wahagera muri iyi santeri mu mwaka wa 2015, gusa bemeza urimo uburiganya no gushaka kwiba abaturage ngo kuko nabo ubwabo kuva batangira gukina batigeze bashobora gutsinda.

Ngirinshuti yagize ati "Nazanye inoti ya bitanu yanjye ndagenda barambwira ngo nimbishyireho barampa ibihumbi icumi mbikubitaho baba barabitwaye, bambwiye ngo bampe amahirwe nshyiremo bibiri bampe bine, nabyo barabitwara, numvise umutwe undiye ndamanuka ndatekereza mbona nandi bayajyana ndataha."

Ibi kandi binagarukwaho na Hakizimana wagize ati"Banyijeje gushyiraho telefoni ngo nta kibazo turakungukira tuguhe ebyiri, telefoni mba nyishyizeho ngiye kureba nsanga agatelefoni barakandiye gutyo nirinda no kugira umuntu mbibwira mvuga ko bakanyibye."

Umunyamabanga Nshingwabikorwa w’Umurenge wa Kiramurunzi Martin Ruzigamanzi yabwiye Imvaho Nshya ko uyu mukino w’amahirwe batari bazi ko uri muri uyu murenge ayoboye, gusa ngo mu ngamba zigiye gufatwa kuba bakimenya aya makuru, ngo ni ukuwurwanya ugacika burundu ngo kuko atari umukino wemewe n’amategeko.

Yagize ati "Uwo mukino najyaga mwumva ariko ntabwo nakwemeza mu murenge wa Kiramuruzi urimo niba hari aho mwawubonye mwadufasha kuduha amakuru tugakurikirana nk’ubuyobozi kuko uwo mukino atari umukino mwiza tukaba twawuca mukaturangira aho uri ku bufatanye n’inzego z’umutekano tukavana icyo kibi mu baturage bacu."

Uretse kuba imikino y’amahirwe akenshi usanga abantu bayitakazamo amafaranga n’umutungo wakabaye ubafasha kwiteza imbere mu yindi mirimo yemewe n’amategeko, abaturage baragirwa inama yo kuyicikaho burundu ngo kuko inashobora kuba imbarutso y’ubushyamirane hagati y’abayikina binashobora kuvamo guhohoterana.

TANGA IGITEKEREZO

 
 
AMATEGEKO AGENGA IYANDIKA RY'IGITEKEREZO CYAWE