2017-11-22 09:53:14 clouds 27o High | Kigali Rwanda

Dukurikire:
 
 

Gakenke:Mutoze abana kwitandukanya n’ingengabitekerezo ya Jenoside-Musabyimana

Yanditswe na IMVAHO NSHYA

Kuya 2017-04-26 15:22:42

 
Share on:
 
Yasuwe:196
 
Yavuzweho:200
 
10
 
10

Guverineri w’Intara y’Amajyaruguru Musabyimana Jean Claude, yasabye ababyeyi kwitandukanya n’ingengabitekerezo ya Jenoside kandi bakabitoza abana babo, mu rwego rwo kwirinda ko Jenoside yazongera kubaho ukundi.

JPEG - 231.9 kb
Guverineri w’intara y’Amajyaruguru Musabyimana Jean Claude

Ubu butumwa uyu muyobozi yabutanze ubwo abaturage bo mu karere ka Gakenke bibukaga Abatutsi bishwe baroshywe mu mugezi wa Mukungwa, mu gihe cya Jenoside yakorewe Abatutsi.

Guverineri Musabyimana yasabye abaturage kwirinda ingengabitekerezo ya Jenoside, ariko by’umwihariko ababyeyi bakayirinda abakiri bato.

Yagize ati “Babyeyi murasabwa gufata iya mbere mu rugamba rwo kurwanya ingengabitekerezo ya Jenoside, mutoza abana banyu kwitandukanya na yo. Turasaba abafite amakuru y’ahari imibiri y’abazize Jenoside itari yashyingurwa mu cyubahiro kuyatanga, turizeza ubufasha abarokotse Jenoside ku bibazo bikibazitiye”.

Nzamwita Déogratias, Umuyobozi w’Akarere ka Gakenke, yavuze ko uwo mugezi waroshywemo Abatutsi benshi, kandi bikaba byarakoranywe ubugome ndengakamere, bikozwe n’interahamwe zatojwe n’ubutegetsi bubi bwariho icyo gihe.

Nyiraneza Justine warokokeye aha, mu buhamya yatanze yagize ati “Abatutsi mbere yo kwicwa babashyiraga hejuru y’uruzi bakabazirika, bakabarega udutuza, bagafata ubuhiri bw’imisumari bakabakubita mu mutwe, ubuhiri busanzwe bakabukubita mu gatuza, ubundi barangiza bakabajugunya muri uwo mugezi ngo bajye gusinya amasezerano y’Arusha”.

Nyiraneza yakomeje agira ati “Uwari Sous-Prefet yakoresheje inama ku cyahoze ari komini Gatonde, avuga ko babwira Abatutsi bakava mu bwihisho, twavuyemo tuzi ko ubutegetsi bugiye kuduha ubuhungiro, abwira interahamwe ngo igiti mukirandurane n’imizi yacyo yose ariko ngo ntimwikore mu inda, n’abatari barishwe icyo gihe bahise bicwa, abandi dusigaye twihishahisha kugeza ubwo turokowe n’ingabo zari iza FPR-Inkotanyi”.

Nsengiyaremye Vincent, na we warokokeye aha, mu buhamya bwe yagize ati “Iyo hatabaho Sous-Prefet wa Sous-Perefegitura ya Busengo witwa Nzanana nta bwo Abatutsi muri aka gace baba barishwe nk’uko byagenze, bitewe n’igitinyiro yari afite muri icyo gihe, yategetse ko twicwa birakorwa.”

Nsengimana uhagarariye Ibuka mu Karere ka Gakenke, yagize ati “Hamaze kumenyakana amazina 167 y’Abatutsi bishwe muri uyu mugezi wa Mukungwa, ariko abarenga 300 ni bo baroshywe muri uwo mugezi kandi baje baturutse mu bice bitandukanye bigize Akarere ka Gakenke y’ubu”.

Abatutsi baroshywe mu mugezi wa Mukungwa ni abakomoka mu cyahoze ari komini Giciye na Gatonde, kuri ubu akaba ari mu mirenge ya Mugunga na Rusasa.
Abarokotse Jenoside muri rusange bashimye ingabo zahoze ari iza FPR Inkotanyi zabarokoye, bizeza ko bazakomeza kwibuka biyubaka, kandi ibyo igihugu cyagezeho bakabisigasira.

atlantis ad

TANGA IGITEKEREZO

 
 
AMATEGEKO AGENGA IYANDIKA RY'IGITEKEREZO CYAWE