2017-10-18 07:01:40 clouds 27o High | Kigali Rwanda

Dukurikire:
 
 

Gakenke: Basabwe gutanga amakuru y’ahakiri imibiri y’abazize Jenoside itarashyingurwa

Yanditswe na Amani

Kuya 2017-04-26 14:30:07

 
Share on:
 
Yasuwe:185
 
Yavuzweho:200
 
10
 
10

Mu gihe bamwe mu barokotse Jenoside yakorewe Abatutsi mu ntara y’Amajyaruguru bavuga ko bafite agahinda ko kuba hashize imyaka 23 batarabona amakuru ku babo bazize Jenoside yakorewe Abatutsi mu 1994, Umuyobozi w’iyi ntara aributsa ko kwimana amakuru ari umugayo n’urubanza ku Mana.

JPEG - 242.8 kb
Abaturage basabwe kurwanya ingengabitekerezo ya Jenoside

Bamwe mu barokotse Jenoside yakorewe abatutsi mu 1994 baganiriye n’Imvaho Nshya, bavuga ko baterwa intimba no kudashyingura ababo mu cyubahiro, bakeka ko bashobora kuba bari hirya no hino ku misozi, abandi ngo bakaba barajugunywe mu nzuzi n’imigezi binyura muri ako karere.

Iragena Jean Marie Vianney wo mu murenge wa Muhondo mu karere ka Gakenke, avuga ko yarokowe n’ingabo zahoze ari iza FPR-Inkotanyi zimukuye mu cyobo cyari i Jari yari yarajugunywemo, ni umwe mu bavuga ko babuze amakuru y’ahari imibiri y’ababo bishwe ngo babashyingure mu cyubahiro.

Yagize ati “Muri uyu murenge wa Muhondo nari mpafite imiryango myinshi, ba Data bacu, ba sogokuru, ba nyogokuru; abo bose uretse nyogokuru umwe ushyinguwe mu rwibutso rwa Muhondo, abandi bose bagiye bagwa hirya iyo mu misozi ariko ntiturababona ngo tubashyingure mu cyubahiro bakwiye.

Kimwe na bagenzi banjye bandi bo muri iyi ntara ndetse no mu gihugu hose, turasaba cyane ko abantu bose bajya bakomeza kuduha amakuru kugira ngo dushobore gushyingura imiryango y’abacu mu cyubahiro bityo tubashe kuruhuka intimba duhorana, kuko imyaka 23 dushakisha amakuru kandi bishoboka ko hari abayafite ni ikibazo gikomeye kandi birababaje.”

Kuri iki kibazo Biyohiki Phocas, umuturage wo mu Murenge wa Muhondo utarahigwaga mu gihe cya Jenoside, we ngo hari uko abibona.

Yagize ati “Mbona abadatanga amakuru y’ahari imibiri y’abazize Jenoside yakorewe Abatutsi mu 1994 baba babiterwa n’ubwoba baba bafite, abenshi bakeka ko batanze ayo makuru bahita bafungwa kubera ko bitakumvikana uburyo bene ayo makuru atangwa nyuma y’imyaka 23 yose, bagahitamo kwinumira.

Ikindi kandi mbona ko hari bamwe babikora kubera ko bashobora kuba bakibitsemo ingengabitekerezo ya Jenoside, gusa ino twe amakuru twarayatanze.”
Guverineri w’intara y’Amajyaruguru Musabyimana Jean Claude, we asanga iki ari ikibazo ndetse gikomeye, ku buryo gikwiye gukemurwa vuba.

Avuga ko kudatanga amakuru we abibonamo umugayo n’urubanza rukomeye imbere y’Imana ndetse n’imbere y’umutima w’udatanga amakuru.

Yagize ati “Uretse no kuba ari umugayo, no kubika ayo makuru ni n’urubanza imbere y’Imana, ariko ni urubanza na none imbere y’umutima wa nyiri kubika ayo makuru.
Ni yo mpamvu dushishikariza abaturage mwese haba mu karere ka Gakenke ndetse n’ahandi mu Ntara y’Amajyaruguru bafite amakuru y’ahantu haba hakiri imibiri y’abazize Jenoside kuyatanga kugira ngo iyo mibiri ihabwe icyubahiro cyambuwe abishwe.”

atlantis ad

TANGA IGITEKEREZO

 
 
AMATEGEKO AGENGA IYANDIKA RY'IGITEKEREZO CYAWE