Advertisement
 
 
 
 
 
 
 
 

Amakuru | Mu Ntara

Bugesera: Basabye gusubizwa inka zabo zatwawe n’Abarundi   

  Yanditswe na HABIMANA CYPRIDION
 4 months ago

 
 

Mu gihe ku wa kane tariki 24 Ugushyingo 2016, Leta y’u Rwanda yashyikirije u Burundi inka 12, zafatiwe mu murenge wa Kamabuye mu karere ka Bugesera tariki 21 Ugushyingo, Abanyarwanda nabo basabye ko basubizwa inka zabo ziri i Burundi.

Inka zatanzwe ni 12 z’umuturage witwa Nkurunziza Charles uzwi ku kabyiniriro ka Cyumbati, wo muri Komine ya Busoni mu Burundi zafatiwe ku butaka bw’u Rwanda mu murenge wa Kamabuye tariki 11 Ugushyingo 2016, yazishyikirijwe ku mupaka wa Nemba ibihugu byombi bihuriyeho.

Umunyamabanga Nshingwabikorwa w’Umurenge wa Kamabuye wari uhagarariye Akarere ka Bugesera Murwanashyaka Oscar; asobanura ko iki gikorwa cyo gusubiza inka nyirazo kiri mu rwego rwo kubanira neza u Burundi, cyane ko ibihugu byombi byari bisanzwe ari ibivandimwe.

Ati "Mu gihe hari inka twafashe ntabwo twazitindana kandi nyirazo yabonetse, kandi tuba twifuza ko nabo ariko babigenza."

Akomeza avuga ko kuzinyuza ku mupaka ari ukugira ngo binyure mu mucyo, n’ubuyobozi bwombi bubishyireho umukono.

JPEG - 455.2 kb
Inka 12 zafashwe zasubijwe ba nyirazo i Burundi

Abaturage bo ku mpande zombi bishimiye iki gikorwa, ariko ku ruhande rw’u Rwanda hari abaturage basaba ko inka zabo zatwawe n’Abarundi bazibiye mu Rwanda na bo bazihabwa.

Rugambarara Athanasie wo mu murenge wa Kamabuye, umwe mubatwariwe inka agira ati "Hari inka zanjye ebyiri zatwawe n’imbonerakure zizikuye ku butaka bw’u Rwanda, zizigejeje hakurya Umuturage w’Umurundi witwa Cyumbati wari asanzwe ari inshuti yanjye ; aziha amafaranga ibihumbi100 zirazimuha, nzibona zirisha ariko nazimwaka akambwira ko bamubwiye ko nazimpa bazamugirira nabi."

Aba baturage bavuga ko imbonerakure ziza zigatwara inka zizikuye ku butaka bw’u Rwanda nyirazo yagira icyo avuga ; zikamubwira ngo "ziramumesura".

Umukozi ushinzwe abinjira n’abasohoka ku ruhande rw’u Burundi Ntezukwigira Philbert avuga ko iki kibazo bagiye kukiganiraho n’ubuyobozi bw’u Burundi, maze izo nka zikazashyikirizwa ba nyirazo.

Umunyamabanga Nshingwabikorwa w’Umurenge wa Kamabuye Murwanashyaka Oscar, yatangaje ko batazi igihe izi nka bazazibonera ariko ko bakomeje ibiganiro.

Inka zatwawe i Burundi ziragera kuri 17, ba nyirazo bavuga ko zibirwa ku butaka bw’u Rwanda, hari izifatwa n’abaturage b’Abarundi bakazishyira mu zabo.

Ubuyobozi bw’imirenge yo mu Rwanda ihana imbibi n’u Burundi bukaba buvuga ko bwakajije ingamba zirimo gusaba abaturage kororera mu biraro no gukaza amarondo.

 

Comments

 
 
Bamwe mu bacururiza ku mupaka wa Rusizi I bahawe amezi 2 yo kuba bimutse
Bamwe mu bacururiza ku mupaka wa Rusizi I bahawe amezi 2 yo kuba bimutse

Ubuyobozi bw’akarere ka Rusizi burasaba abagize urugaga rw’abikorera muri aka karere n’abacuruzi bakorera ku mupaka wa Rusizi ya mbere, kwicara hamwe bitarenze amezi 2 bakareba bimwe mu bicuruzwa (...)

Rusizi: Ubuyobozi bwahagurukiye abagabo bamarira umutungo w’urugo mu kabari
Rusizi: Ubuyobozi bwahagurukiye abagabo bamarira umutungo w’urugo mu kabari

Amakimbirane yo mu miryango mu karere ka Rusizi akenshi ashingira ku businzi bukabije bw’umwe mu bagize umuryango, aho hari aho usanga umugabo akorera amafaranga yose aho kuyacyura akayamarira mu (...)

Kirehe:Abaturage biyubakiye ivuriro rya miliyoni 83
Kirehe:Abaturage biyubakiye ivuriro rya miliyoni 83

Abaturage bo mu kagari ka Kiyanzi, umurenge wa Nyamugali, mu karere ka Kirehe bagorwaga no gukora ingendo ndende bajya kwivuza, ubu barishimira ko baruhutse, kuko biyujurije ivuriro ‘Poste de (...)

Ngoma: Amapfa yatije umurindi ubujura
Ngoma: Amapfa yatije umurindi ubujura

SSP Janvier Mutaganda, Umuyobozi wa Polisi y’u Rwanda mu karere ka Ngoma, avuga ko ubujura bwiganjemo ubw’umusaruro w’ibikomoka ku buhinzi n’amatungo, bwagaragaye cyane muri aka karere mu mwaka (...)

Musanze:Abahinzi b’ibigori bahangayikishijwe n’indwara yitwa Cyumya
Musanze:Abahinzi b’ibigori bahangayikishijwe n’indwara yitwa Cyumya

Ikigo cy’igihugu gishinzwe ubuhinzi n’ubworozi, RAB, kirakangurira abahinzi b’ibigori gukoresha imbuto y’indobanure no gusimburanya ibihingwa mu murima hagamijwe kurwanya indwara y’ibigori yitwa (...)

Advertisement

OPP. MAGERWA, EXPO GROUND, GIKONDO KIGALI, RWANDA PHONE NO : +250-784867952 / 53

© Copyright 2015: Imvaho Nshya. All rights reserved.
Powered by: RPPC.