Advertisement
 
 
 
 
 
 
 
 

Amakuru | Mu Ntara

Abagana ibitaro bya Kirehe barasaba ko ifunguro bahabwa ryongerwa   

  Yanditswe na MANISHIMWE NOËL
 3 months ago

 
 

Abarwayi bivuriza mu bitaro bya Kirehe bavuga ko bashima gahunda y’ibi bitaro yo kugaburira abarwayi ibyo kurya nta kiguzi batanze, kuko yunganira cyane abadafite ubushobozi n’abatagira ababagemurira, ariko bagasaba ko ibiryo byakongerwa kuko ingano yabyo ikiri hasi.

Mu bitaro bya Kirehe buri murwayi urimo aba yemerewe guhabwa igikoma mu gitondo, hanyuma akaza no gufata ifunguro ryo ku manywa na nimugoroba mu bitaro, riba rigizwe akenshi n’ibishyimbo n’umuceri.Babihabwa nta kiguzi.

Yaba abarwayi n’abarwaza mu bitaro bya Kirehe bavuganye n’Imvaho Nshya, bahuriza ku kuba iyi gahunda yo guhabwa amafunguro ku barwayi ibunganira cyane.

JPEG - 204.4 kb
Abarwariye mu bitaro bya Kirehe bifuza ko ifunguro rigenerwa umurwayi ryakongerwa

Maniriho Innocent, wo mu murenge wa Nyamugari ari hafi kumara icyumweru arwaje muri ibi bitaro, avuga ko yunganirwa cyane n’ibiryo bigenerwa umurwayi we buri munsi, nta kiguzi.

Yagize ati “Umurwayi wanjye amazemo iminsi 4, ariko abona ibiryo nta kibazo. Biranyorohereza cyane kubera ko iwacu ari ahantu bisaba itike.

Hari n’igihe umunsi ushobora gushira nta muntu wakugemuriye, ukifashisha bimwe baguhaye.Hari n’igihe baguha imiti ugomba kuyinywa wariye, biba byoroshye.”
Abagana ibi bitaro bya Kirehe babwiye Imvaho Nshya ko nubwo bishimira serivise yo guhabwa amafunguro ku buntu, bifuza ko harebwa uburyo ibiryo bahabwa byakongerwa, bitewe nuko ngo bahabwa ibyo bita bike, hakabaho gusaranganya.

Ntamushobora Agnès umaze iminsi 2 aharwariye, yagize ati “Hari igihe uza uri umuntu w’umukene nta bushobozi ufite, wagera hano bakaguhereza dukeya kubera ko abarwayi turi benshi, ugaha umurwayi wawe akarya, tubona ari ugusaranganya.”

Mugenzi we na we wari urwaje yaturutse mu karere ka Gatsibo yagize ati “Ntabwo bihagije, ni ugusaranganya, ni duke batanga, ni akarushe gatoya cyane, igikoma nacyo ni igikombe gicagase. Umurwaza n’uburwayi ni byo basangira. Twumva niba ibiryo bihari bajya bagaburira abarwayi.”

Dr. Ngamije Patient, Umuyobozi w’ibitaro bya Kirehe, avuga ko gahunda yo kugaburira abagana ibi bitaro yashyiriweho kunganira abarwayi. Agaragaza ko nta gahunda yo kongera ingano y’amafunguro abagenerwa iteganyijwe mu gihe cya vuba.

Yagize ati “Twemera ko bishobora kuba bidahagije ariko ikigamijwe ni ukugaburira umurwayi.Tubagaburira ku buntu, nubwo navuga ko biduhenze ariko amahirwe dufite nuko dufite umuterankunga ubidufashamo. Amabwiriza avuga ko umurwaza, abantu bo mu muryango we bashobora kumugemurira.”

Dr. Ngamije akomeza asobanura ko amafunguro atangwa agenerwa umurwayi gusa, umwihariko ukaba ku mpunzi z’abarundi zivuriza muri ibi bitaro, kuko ngo bitoroshye ko zabona uzigemurira.

Agira ati “Umwihariko uba ku baturuka mu nkambi ya Mahama, icumbikiwemo abarundi, nabo baza kwivuriza hano. Ni bo gusa bagenerwa amafunguro ku murwayi n’umurwaza kubera ko ntawe bashobora kubona ubagemurira. Ariko na bo hari amasezerano tugirana n’abayobora inkambi ku buryo nabo bafasha mu biryo tubasha kubagaburira.”

Abarwayi bari hagati ya 60-100 ku munsi ni bo bagana ibitaro bya Kirehe, bifite ubushobozi bwo gucumbikira abarwayi bagera kuri 210.

Impuzandengo y’abarwayi bari hagati ya 1300-1800 ku kwezi, ni wo mubare ubuyobozi bw’ibi bitaro bugaragaza ubagana ibi bitaro, bimaze imyaka umunani bitangiye gukora.

 

Comments

 
 
Urubyiruko rw’i Rusizi rugiye guhabwa inkoko 18 000
Urubyiruko rw’i Rusizi rugiye guhabwa inkoko 18 000

Ubuyobozi bw’akarere ka Rusizi buravuga ko mu mezi make ari imbere inkoko 18.000 zigiye guhabwa urubyiruko rwibumbiye mu makoperative. Ni umushinga munini kandi urambye uzarukura mu bukene (...)

Rubavu:Kiliziya Gatolika yahagurukiye ikibazo cy’abasore n’inkumi bishyingira
Rubavu:Kiliziya Gatolika yahagurukiye ikibazo cy’abasore n’inkumi bishyingira

Ubuyobozi bwa Paruwasi Gatolika ya Gisenyi mu karere ka Rubavu, buravuga ko bwiteguye gufasha urubyiruko mu buryo bwose bushoboka, ariko rugacika ku muco wo kwishyingira ugenda ufata indi ntera. (...)

Karongi:Arasaba ubufasha bwo kwivuza kanseri yo mu maraso amaranye umwaka
Karongi:Arasaba ubufasha bwo kwivuza kanseri yo mu maraso amaranye umwaka

Nyiranshuti Venantie, umubyeyi w’imyaka 60 utuye mu mudugudu wa Kananira, akagari ka Birambo, umurenge wa Gashali mu karere ka Karongi, arasaba ubufasha bwo kwivuza Kanseri yo mu maraso amaranye (...)

Ubwato Perezida Kagame  yahaye abaturage bo ku Nkombo buratanga umusaruro ushimishije
Ubwato Perezida Kagame yahaye abaturage bo ku Nkombo buratanga umusaruro ushimishije

Abaturage bo mu murenge wa Nkombo mu karere ka Rusizi, barashimira cyane Perezida Paul Kagame wabahaye ubwato bwabakuye mu bwigunge, ubu bakaba banishimira ko umusaruro w’amafaranga arenga (...)

Hagiye gushingwa ikigo kizarererwamo abana ababyeyi basigaga ku mupaka w’u Rwanda na Congo
Hagiye gushingwa ikigo kizarererwamo abana ababyeyi basigaga ku mupaka w’u Rwanda na Congo

Nyuma y’aho mu karere ka Rubavu hagiye havugwa ikibazo gikomeye cy’abana basigwa ku mupaka n’ababyeyi babo, babareresha abandi bana bagenzi babo, mu gihe bo baba bagiye gucururiza Kongo, ubu (...)

Advertisement

OPP. MAGERWA, EXPO GROUND, GIKONDO KIGALI, RWANDA PHONE NO : +250-784867952 / 53

© Copyright 2015: Imvaho Nshya. All rights reserved.
Powered by: RPPC.