2017-07-21 15:15:02 clouds 27o High | Kigali Rwanda

Dukurikire:
 
 

London: Uruhinja rwajugunywe na nyina wari mu igorofa ya 10 y’inyubako iri gushya rurarokoka

Yanditswe na IMVAHO NSHYA

Kuya 2017-06-15 07:08:50

 
Share on:
 
Yasuwe:1768
 
Yavuzweho:200
 
10
 
10

Umubyeyi wari mu igorofa ya cumi y’inyubako ya Grenfell Tower yibasiwe n’inkongi ejo hashize, yajugunye uruhinja rwe rusamwa n’umugabo wari hasi mu kivunge cy’abantu bashungereye, ntirwagira icyo ruba.

Iyo nyubako y’amagorofa 24 yafashwe n’inkongi mu gicuku, abantu 12 barapfa 18 barakomereka bikomeye abandi 79 bajyanwa mu bitaro. Mu gihe abazimya umuriro bari bagihangana n’inkongi, hari abatuye muri iyo nyubako mu duce tutari twafashwe bari bahiye ubwoba bibwira ko ibyabo byarangiye.

Muri bo hari umugore woherereje inshuti ze za hafi ubutumwa ababwira ati “abo nakoshereje bose mumbabarire, kandi murabeho.”

Umwe mu bari bashungereye hafi y’iyo nyubako, Samira Lamrani, yabwiye Daily Mail ko yabonye umugore mu idirishya ry’igorofa ya cumi, asakuza abwira abari hasi ngo bamusamire umwana. Yahise amujugunya, ni uko umwe mu bagabo bari hasi agenda yiruka amusama ataragera hasi.

Samira yagize ati “ Amadirishya yari afunguye , umugore yazunguzaga amaboko avuga ko agiye kujugunya umwana we , bigaragara ko ari kubaza niba hari uwamumusamira. Hari uwabyemeye, umugabo umwe yatuvuyemo ariruka aramusama!”

Yunzemo ati “Nabonaga abantu benshi mu mfuruka zose z’inzu batabaza bashaka uwabafasha. Bamwe mu bagize imiryango yabo bageragezaga kubahumuriza bavuga ko bahamagaye polisi ariko ukabona mu isura yabo bihebye, bategereje urupfu.”

"Inshuti y’umukobwa wanjye yavuze ko yabonye umugabo umwe wagerageje gukora igisa nk’umutaka, ashaka kuwugurukamo. Mu magorofa hari abantu benshi cyane, batabarika. Benshi bari abana bumvikana mu tujwi twabo tuvugira hejuru , tuzanguma mu mutwe igihe kinini.”

Abantu basaga 600 bari muri iyo nyubako bose bakangukiye hejuru bamwe babitewe n’umwotsi abandi n’urusaku rwa bagenzi babo. Abarokotse bavuze ko byari bimeze nk’ikuzimu.

Inyubako yahiye yubatswe mu 1974, yari imaze umwaka umwe ivuguruwe bitwaye miliyoni 10 z’ama pound, bikekwako iyo nkongi yatewe na frigo yagize ikibazo mu cyumba kimwe ariko polisi ntirabyemeza.

TANGA IGITEKEREZO

 
 
AMATEGEKO AGENGA IYANDIKA RY'IGITEKEREZO CYAWE