2017-08-17 08:49:58 clouds 27o High | Kigali Rwanda

Dukurikire:
 
 

Kiliziya Gatolika yemereye abakirisitu gutwika imirambo y’ababo

Yanditswe na IMVAHO NSHYA

Kuya 2016-10-26 11:17:10

 
Share on:
 
Yasuwe:2
 
Yavuzweho:200
 
10
 
10

Umushumba wa Kiliziya Gatolika, Papa Francis yemeje ibwiriza ryemerera abakirisitu gutwika imirambo y’ababo bapfuye.

Ni ibwiriza ryiswe “Ad resurgendum cum Christo" (Kuzukana na Kirisitu), rivuga ko Kiliziya yemera izuka ry’abapfuye kandi umubiri ukaba igice gikomeye mu bigize umuntu, bityo ko imibiri y’abapfuye ishobora gutwikwa ariko ivu rigafatwa neza rigahambwa ahantu hiyubashye.

Kiliziya Gatolika ivuga ko yemera ko abantu bashobora guhambwa mu butaka cyangwa bagatwikwa, ariko ikaziririza gutagaguza ivu ry’uwapfuye cyangwa kuribika mu rugo.

Karidinali Gerhard Müller, ushinzwe Inama y’Ihame ry’Ukwemera muri Vatikani yabwiye itangazamakuru ejo hashize ko Kiliziya yemera izuka kandi ikaba yitandukanyije n’abavuga ko iyo umuntu apfuye biba birangiye, cyangwa ko yongera akagaruka yihinduye ikindi kinyabuzima.

Muller ntiyagaragaje neza uko abakirisitu bazajya bahamba ivu cyangwa ahandi Kiliziya yifuza ko rizajya ribika.

Iryo bwiriza rivuga ko gutwika umurambo bitavuze guhakana ko roho idapfa cyangwa ko umubiri uzazurwa ku munsi wa nyuma.

Kiliziya iti “Gutwika umurambo ntibibuza Imana, yo ishobora byose, kuzura umubiri w’uwapfuye mu buzima bushya.”

Ubuyobozi bwa Kiliziya ariko busaba abakilisitu gukomera ku muco wo gushyingura abapfuye mu gitaka, kuko byerekana impuhwe no gufatana mu mugongo kandi bigashushanya guhambanwa no kuzukana na Yezu Kirisitu.

Karidinali Muller ati “ Iyo umuntu ashyinguwe mu gitaka cyangwa ivu rye rikabikwa ahabugenewe cyangwa mu mva; iyo mva cyangwa aho hantu hagomba kwandikwa izina rye, iryo yabatijwe ari naryo Imana ikoresha iri kumuhamagara.”

Yongeyeho ko umubiri wa muntu atari umwanda bityo rero ko kujugunya ivu rye cyangwa kumuhamba ahantu hatazwi bikaba bitemewe mu myemerere ya gikirisitu.

Agira inama abafite ababo batazi aho bashyinguwe kubashyiriraho urwibutso ahantu hiyubashye nko mu kiliziya cyangwa ahandi, hagashyirwaho izina rya nyakwigendera kuko ari ikimenyetso cy’ubusabane n’abatagatifu n’ubumwe bwa Kirisitu n’ababatijwe bose, baba bakiriho cyangwa barapfuye.

Kiliziya yemera ko umukirisitu afite uburenganzira bwo gusengera kumva y’uwo watabarutse akibuka n’abandi bapfuye b’abagatolika ku munsi w’abatagatifu bose. Mu Rwanda naho itegeko rigena gutwika imirambo ryamaze kwemezwa, riri hafi gushyirwa mu bikorwa.

atlantis ad

TANGA IGITEKEREZO

 
 
AMATEGEKO AGENGA IYANDIKA RY'IGITEKEREZO CYAWE