Advertisement
 
 
 
 
 
 
 
 

Amakuru | Mu Mahanga

Cameroun: Ibitero 3 by’ubwiyahuzi byagabwe mu masaha 24   

  Yanditswe na KAYIRA ETIENNE
 3 months ago

 
 

Mu ijoro ryo ku wa Mbere bucya ari ku wa Kabiri w’iki cyumweru turimo, ibyihebe byo mu mutwe wa Boko Haram byagabye ibitero 3 by’ubwiyahuzi ku birindiro by’ingabo za Cameroun bihitana abasirikare 6 barimo aba ofisiye babiri n’abandi bato bane.

Igitero cyagize ubukana nk’uko bitangazwa na Radiyo Mpuzamahanga y’u Bufaransa (RFI), ni icyagabwe mu nkambi ya gisirikare iri ku kirwa cya Dakar mu isoko y’inyanja ya Tchad, igitero abarwanyi ba Boko Haram bagabye mu gihe cya saa yine z’ijoro tariki 21 Ugushyingo 2016.

RFI iti “Cameroun ikomeje kwibasirwa cyane n’ibyihebe bya Boko Haram kandi hari amakuru yavugaga ko abarwanyi b’uyu mutwe bagenda bacika intege mu karere k’ibihugu biherereye muri Afurika yo hagati”.

Hashize imyaka irenga ibiri ingabo z’ibihugu bya Tchad, Niger, Cameroun na Nigeriya zishyize hamwe kurwanya uyu mutwe w’ibyihebe ariko ntizirabasha gusenya burundu ibirindiro by’abo dore ko byamaze kubaka imbaraga zikomeye muri aka gace ku mugabane w’Afurika.

JPEG - 81.9 kb
Ibitero byagabwe ku ngabo za Cameroun byahitanye batandatu

RFI imenyesha ko iki gitero cyo ku wa Kabiri Boko Haram yagabye muri Cameroun, ari cyo cyishe abasirikare benshi bwa mbere kuva ingabo zacyo zigiye kwifatanya n’izindi zo mu karere kurwanya hamwe uyu mutwe mu mwaka wa 2014.

Uwagize uruhare muri icyo gitero ngo ni umusore w’umwiyahuzi waje agendera kuri moto ashaka kwinjira mu nkambi y’impunzi iri mu mujyi wa Kolofata ariko ngo aza kuraswa n’abashinzwe umutekano bari ku burinzi hafi aho.

Ati “Yarashwe atari yaturitsa ibisasu yari yambaye ku mukandara”. Kuri uwo munsi umwe, undi mwiyahuzi yagerageje kugaba ikindi gitero cy’ubwiyahuzi mu mudugudu wa Ndiguina muri ako karere kamwe ariko na cyo kiburizwamo n’ingabo z’igihugu.

Impuguke zo mu karere k’Afurika yo hagati bemeza ko ibyo bitero bitatu by’ubwiyahuzi byagabwe muri Cameroun mu masaha 24 gusa, ngo bigaragaza ko umutwe wa Boko Haram ugifite ibirindiro bikomeye mu ntara y’amajyaruguru y’iki gihugu kabone n’ubwo abahanga mu bijyanye n’intambara baherutse gutangaza ko uyu mutwe w’ibyihebe ugenda utsindwa.

Muri Nyakanga 2016, Umuryango w’abibumbye watangaje ko mu karere k’ibihugu bikora ku nyanja ya Tchad hari ikibazo gikomeye kitavugwa cyane, ikibazo cy’urugamba rutoroshye gutsinda rwa Boko Haram kandi rubangamiye ubuzima bw’abahatuye.

Urwo rugamba rwa Boko Haram ngo rwateje inzara ikabije kuko abaturage badahinga nk’uko bisanzwe imirima yabo kuko bamwe bahunze naho abatari bahunga bakaba batinya ntibajye ku murimo nk’ibisanzwe.

Icyo gihe Najat Rochdi, umuhuzabikorwa wa Loni ushinzwe ibikorwa by’ubutabazi muri Cameroun yagize ati “Ibitero bya Boko Haram muri Cameroun byateje inzara ikomeye mu bice bimwe by’igihugu kuko guhera muri Mutarama, nibura abaturage bakabakaba miliyoni eshatu bavuye mu byabo”.

Uyu mukozi wa Loni avuga ko uyu mubare ugenda wiyongera buri kwezi, ku buryo ngo Abanyakameruni bahunze bari mu nkambi bamaze kugera ku bihumbi ijana na mirongo icyenda.

Iki kibazo cy’imitwe y’iterabwoba cyari gisanzwe gihangayikishije cyane ibihugu byo ku mugabane w’u Burayi, ariko muri iyi myaka itatu ishize byagaragaye ko ibyihebe bimaze gushinga ibirindiro bikomeye mu bihugu bimwe byo ku mugabane w’Afurika.

 

Comments

 
 
U Bwongereza: Abadepite bagiye impaka ku ruzinduko rwa Donald Trump
U Bwongereza: Abadepite bagiye impaka ku ruzinduko rwa Donald Trump

Abagize Inteko Ishinga Amategeko y’u Bwongereza bagiye impaka ku rugendo Perezida wa Leta Zunze Ubumwe za Amerika, Donald Trump azagirira mu gihugu cyabo mu minsi mike iri imbere. CNN ivuga ko (...)

Libya: Hatoraguwe imibiri y’abimukira basaga 70 bashakaga kujya i Burayi
Libya: Hatoraguwe imibiri y’abimukira basaga 70 bashakaga kujya i Burayi

Umuryango mpuzamahanga utabara imbabare, Croix-Rouge kuri uyu wa Kabiri watangaje ko watoraguye imibiri y’abimukira 74 bapfuye barohamye ubwo bashakaga kujya mu Burayi banyuze mu nyanja ya (...)

Zimbabwe: Robert Mugabe yujuje imyaka 93, ashimangira ko azongera kwiyamamaza
Zimbabwe: Robert Mugabe yujuje imyaka 93, ashimangira ko azongera kwiyamamaza

Perezida wa Zimbabwe, Robert Mugabe yujuje imyaka 93 kuri uyu wa 21 Gashyantare 2017, avuga ko aziyamamaza mu matora y’imukuru w’igihugu ateganyijwe mu mwaka utaha. Mu kiganiro yagiranye na (...)

Kirehe:Batewe impungenge n’utukoko twibasiye amasaka bahinze
Kirehe:Batewe impungenge n’utukoko twibasiye amasaka bahinze

Abaturage bo mu kagari ka Munini, umurenge wa Mahama mu karere ka Kirehe barasaba ubuyobozi kubakorera ubuvugizi bakabona umuti w’udukoko twibasiye amasaka bahinze, kuko ari kumera yagera hejuru (...)

Gambia : Perezida Barrow yarekuye imfungwa za politiki
Gambia : Perezida Barrow yarekuye imfungwa za politiki

Perezida wa Gambia, Adama Barrow, yatanze amabwiriza yo kurekura imfungwa zose zari muri gereza zitaraburanye kubera igitugu cya Yahya Jammeh. Mu ijambo yavuze ku wa Gatandatu w’icyumweru (...)

Advertisement

OPP. MAGERWA, EXPO GROUND, GIKONDO KIGALI, RWANDA PHONE NO : +250-784867952 / 53

© Copyright 2015: Imvaho Nshya. All rights reserved.
Powered by: RPPC.