Advertisement
 
 
 
 
 
 
 
 

Amakuru | Mu Mahanga

Burundi: Urujijo mu isezererwa ry’intumwa ya Loni   

  Yanditswe na KAYIRA ETIENNE
 1 week ago

 
 

Jamal Benomar, intumwa yihariye y’Umuryango w’abibumbye mu Burundi biravugwa ko yaba yasezerewe ariko kugeza magingo aya nta mutegetsi wo muri Guverinoma ya Bujumbura wemera ko azi ayo makuru.

Igitangazamakuru Iwacu kigira kiti “Guverinoma y’u Burundi ntishaka gukomeza gukorana n’umuhuza wayo na Loni Jamal Benomar. Uko ni ko urwandiko rwanditswe na Perezida Pierre Nkurunziza ruvuga. Ariko igiteye urujijo ni uko guhera mu cyumweru gishize, Minisiteri ishinzwe ububanyi n’amahanga mu Burundi yavugaga ko amakuru y’urwo rwandiko itari iyazi. Na Pilippe Nzobonariba, umuvugizi wa perezidansi ubwe yatumenyesheje ko yagerageje kubaza iby’iyo baruwa ntiyamenya amakuru yayo”.

Mu kiganiro Ambasaderi Bernard Ntahiraja, uyoboye Minisiteri y’ububanyi n’amahanga by’agateganyo yagiranye na Iwacu yagize ati “Iyo baruwa nta yo twanditse muri minisiteri, nta n’amakuru ya yo numvise”.

Umuvugizi wa Perezidansi y’u Burundi Nzobonariba we ngo yagize ati “Nagerageje ubwanjye kubaza amakuru y’iyo baruwa, ariko nta yo namenye”. Ikinyamakuru Iwacu ngo cyanabajije Willy Nyamitwe, umujyanama wa Perezida iby’iyo baruwa yo kwirukana Jamar Benomar intumwa ya Loni mu Burundi.

Ati “Numva naba nifashe singire icyo mbivugaho muri iki gihe”. Gusezererwa k’uyu muhuza wa Loni na Leta y’u Burundi, ngo byatunguye abantu benshi harimo n’abari mu nzego z’ubutegetsi bwa Perezida Nkurunziza kuko uwo Benomar yari azwi ko akorana neza n’ubutegetsi bwa Bujumbura.

Abakurikiranira hafi imikoranire ya Benomar na Leta ya Bujumbura bavuga ko iyi ntumwa ya Loni mu ruhame yavuganiraga u Burundi, ariko byagera igihe cyo gutanga raporo ngo akagaragaza amakosa yose akorwa nta na rimwe asize.

Mu mvugo ye nziza ngo yagiraga ati “Ibibazo u Burundi bufite bigomba gushakirwa igisubizo n’Abarundi ubwabo”. Iyi mvugo ya Jamar yashimwaga cyane n’ubutegetsi bwa Bujumbura kuko bumvaga adashyigikiye ko ibihugu by’amahanga n’imiryango mpuzamahanga nka EU, cyangwa Afurika yunze ubumwe (AU) bivanga mu makimbirane abanyapolitiki b’iki gihugu bamazemo iminsi irenga umwaka n’igice.

Mu busesenguzi bw’impuguke mu bibazo by’iki gihugu, Leta y’u Burundi gusezerera iyi ntumwa yihariye yoherejwe n’akanama ka Loni gashinzwe umutekano mu gihe iki gihugu kitari kikivuga rumwe n’Umuryango Mpuzamahanga muri rusange, bwaba ari uburyo bwo kumwikiza kugira ngo ubwo Loni yamaze kubona undi munyamabanga mukuru wa yo mushya uzasimbura Ban Ki-Moon, hazaze indi ntumwa nshya itazi neza dosiye y’ibyo Guverinoma ya Perezida Nkurunziza iregwa mu bwicanyi bwakorewe abaturage batavugaga rumwe n’abandi bafunzwe kimwe n’ababuriwe irengero.

JPEG - 146.7 kb
Jamal Benomar, intumwa yihariye ya Loni mu Burundi (Foto Iwacu)

Ati “Intumwa nshya ya Loni mu Burundi niza, byinshi mu byo iyi Leta yaregwaga bizatinda kuvugwaho kabone n’ubwo hari iyandiko zashingirwaho. Hari n’ibishobora kurekwa kuko umukozi mushya arenzaho kugira ngo adahita atangirana n’ibibazo mu kazi ke rugikubita bityo Guverinoma ya Bujumbura ikaba ibikiriyemo”.

Byaba bifite ihuriro na Raporo ya FIDH ?

Hari abatekereza ko isezererwa ry’intumwa yihariye ya Loni mu Burundi byaba bifite aho bihuriye na raporo imiryango itegamiye kuri Leta FIDH na Ligue Iteka byasohoye ku bijyanye nuko uburenganzira bw’ikiremwamuntu bihagaze muri iki gihugu cyo mu Biyaga bigari? Iyo raporo yasohotse ku wa 15 Ugushyingo, igaragaza ko kuva imvururu zatangira mu Burundi muri Mata 2015, ngo hamaze kwicwa nibura Abarundi bagera ku 1 000.

Muri Raporo FIDH na Ligue Iteka biharanira uburenganzira bw’ikiremwamuntu bise “Imvururu ziganisha kuri Jenoside mu Burundi”, bagira bati “Mu bushakashatsi bwakozwe twasanze mu mwaka umwe n’igice imvururu zo mu Burundi zimaze zitangiye, hamaze kwicwa abantu barenga igihumbi. Abantu bagera ku 8 000 bafungiwe ibibazo bya politiki naho abari hagati ya 300 na 800 baburiwe irengero. Mu bari mu nzu z’imbohe harimo abakorerwa iyicarubozo n’itotezwa ndengakamere, ndetse hariho n’abagore bafashwe ku ngufu n’abanyagihugu benshi bagiye bafungwa mu buryo budakurikije amategeko”.

Raporo yashyizwe ahagaragara n’iyo miryango, hari cyane cyane inzego zishinzwe umutekano mu gihugu. Nka SNR (Service national de renseignement), Urwego rw’igihugu rushinzwe iperereza. Abandi bashinjwa muri iyo raporo ni: Abasirikare bo mu mutwe ushinzwe guhosha imvururu uzwi ku izina rya BAE (Brigade anti-émeute), Umutwe ushinzwe kurinda inzego z’igihugu API (Agence de protection des institutions), Itsinda rishinzwe gutabara aho rukomeye bita GMIR (Groupement mobile d’intervention rapide) na biro ya polisi izwi ku izina rya BSR (Bureau spécial de recherche de la police judiciaire).

Haravugwa kandi Batayo y’ingabo bita “génie des combats” hamwe na bataillon ya 221 igizwe n’Abakomando bo mu Ruyigi. na Burigade y’abasirikare badasanzwe bashinzwe gucunga ahakorera inzego za Leta (BSPI).

Izi nzego zose zishinzwe umutekano mu Burundi, ngo zatangiye ibikorwa byo kwica no guta muri yombi no gutoteza abo batavuga rumwe na Guverinoma umunsi umwe nyuma ya kudeta yo guhirika Perezida Nkurunziza ku butegetsi yaburijwemo ku wa 13 Gicurasi 2015.

Abishwe n’abafunzwe ngo ni Abarundi babaga bakekwaho kurwanya Leta, ari naho iyi raporo ihera ivuga ko ubwicanyi bwakozwe bufite aho buhuriye na Jenoside kuko bwateguwe n’inzego za Leta kandi zihohotera abantu batekerejweho mu buryo budatunguranye.

Gusa, abakoze iyi raporo bemeza ko hari n’Abarundi bandi bishwe n’abarwanyi b’imitwe itavuga rumwe n’ubutegetsi bwa Bujumbura.

Leta ivuga ko raporo ya FIDH igamije guharabika

Iyo raporo ku Burundi yatanzwe n’imiryango ishinzwe kurengera uburenganzira bw’ikiremwamuntu, Ligue ITEKA na FIDH, Willy Nyamitwe umujyanama wihariye wa Perezida Nkurunziza ku bijyanye n’itangazamakuru, yagize ati “Izo raporo zo guharabika u Burundi nta bwo ari ubwa mbere zitanzwe. Icya mbere ziba zibogamye nta kuri kurimo nk’uko tutahwemye kubigaragaza. Nta mahoro ziba zigamije uretse gutesha umurongo bamwe mu Barundi. Raporo nk’izi nanone usanga zigamije kuyobya Umuryango Mpuzamahanga na Loni n’Umuryango w’Afurika yunze ubumwe (AU) ndetse n’Akanama ka Loni gashinzwe umutekano ku isi, mu byemezo bafata kugira ngo bibangamire igihugu cyacu n’abaturage bacyo”.

Jérémie Minani, Umuvugizi w’imiryango ya sosiyete sivile wahunze imvururu mu Burundi, asanga iyo raporo ya FIDH na Ligue ITEKA ije gushimangira ukuri ku bwicanyi bwatangiye gukorerwa Abarundi guhera mu 2015 aho ngo igice kimwe cy’abaturage cyibasiwe bikomeye.

Ati “Ntabwo tuzaceceka kubivuga. Hashize amezi hafi 18 Abarundi bicwa isi yose irebera”. Avuga ko gutabara Abarundi byakorwa mu buryo 2: kohereza ingabo z’amahanga kurengera ubuzima bw’abanyagihugu no gushyikiriza Urukiko Mpuzamahanga mpanabyaha rw’i La Haye mu Buholandi dosiye z’abakekwaho uruhare mu bwicanyi bw’Abarundi”.

Anschaire Nikoyagize umuyobozi wa Ligue Iteka avuga ko iyi raporo yagombye gutera akanyabugabo Umuryango Mpuzamahanga kugira icyo ukora mu guhagarika ubwicanyi hadategerejwe ko bwaba Jenoside.

 

Comments

pre-moderation

This forum is moderated before publication: your contribution will only appear after being validated by an administrator.

Who are you?
Your post
  • To create paragraphs, just leave blank lines.

 
 
RDC: EU irasabira ibihano 5 mu bashinzwe umutekano
RDC: EU irasabira ibihano 5 mu bashinzwe umutekano

Abagize Inteko ishinga amategeko y’Umuryango w’Ubumwe bw’u Burayi(EU), barasabira ibihano Abanyekongo 5 mu bashinzwe umutekano muri Repubulika iharanira demokarasi ya Congo (DRC) baregwa uruhare mu (...)

Abanzi ba Isiraheli bayitera guhora iryamiye amajanja
Abanzi ba Isiraheli bayitera guhora iryamiye amajanja

Isiraheli ni kimwe mu bihugu byo mu Burasirazuba bwo hagati gifite abanzi benshi. Kubera iyi mpamvu, ubutegetsi bw’iki gihugu cy’Abayahudi buhora bwiteguye mu rwego rwo kwirinda ibitero by’abanzi. (...)

Perezida Kagame yitabiriye inama idasanzwe ya CEEAC muri Gabon
Perezida Kagame yitabiriye inama idasanzwe ya CEEAC muri Gabon

Perezida Paul Kagame na Madamu Jeannette Kagame bitabiriye inama idasanzwe y’abakuru b’ibihugu bigize Umuryango w’ubukungu bw’ibihugu byo muri Afurika yo hagati (CEEAC) i Libreville muri Gabon, kuri (...)

Burundi: Willy Nyamitwe yarokotse urupfu
Burundi: Willy Nyamitwe yarokotse urupfu

Umuyobozi ukuriye ishami ry’itumanaho muri Perezidansi ya Leta y’u Burundi, Willy Nyamitwe, yarokotse igitero cy’abashakaga kumwica ku wa mbere tariki 28 Uguahyingo. Amakuru dukesha BBC agaragaza (...)

UK: Abanyarwanda barokotse Jenoside babangamiwe n’abayikoze bacyidegembya
UK: Abanyarwanda barokotse Jenoside babangamiwe n’abayikoze bacyidegembya

Ihuriro ry’Abanyarwanda barokotse Jenoside yakorewe Abatutsi baba mu Bwongereza babangamiwe cyane n’uko abagize uruhare muri iyi Jenoside yatwaye ubuzima bw’abasaga miliyoni bacyidegembya muri iki (...)

Advertisement

OPP. MAGERWA, EXPO GROUND, GIKONDO KIGALI, RWANDA PHONE NO : +250-784867952 / 53

© Copyright 2015: Imvaho Nshya. All rights reserved.
Powered by: RPPC.