Advertisement
 
 
 
 
 
 
 
 

Amakuru | Mu Mahanga

Abayobozi ba FDLR mu mashyamba bahora bumvirije iterambere ry’u Rwanda   

  Yanditswe na NTAWITONDA JEAN CLAUDE
 5 April

 
 

Bamwe mu basirikare bakuru bigobotoye umutwe wa FDLR bahamya uburyo aho baturutse muri Repubulika Iharanira Demokarasi ya Kongo bakurikiraniraga hafi amakuru y’iterambere ry’u Rwanda ariko kubera inyungu z’abayobozi, umubare munini w’Abanyarwanda ukaba ugifashwe bugwate mu mashyamba y’iki gihugu.

Nyuma y’imyaka igera kuri 22 bari mu mashyamba, aba basirikare bari n’abayobozi bakomeye basanze impinduka nyinshi mu gihugu, banihera ijisho ibyo bibwiraga ko ari impuha. Gahunda z’iterambere zagejejwe ku banyarwanda zatumye icyizere cyo kubaho cyari kubaho cyarahananutse kikagera ku myaka 32 muri Jenoside yakorewe Abatutsi ubu kigeze ku myaka 66 nk’uko bigaragazwa n’Ikigo cy’Igihugu cy’Ibarurishamibare (NSIR).

Mu kiganiro kirambuye Imvaho Nshya yagiranye na Colonel Nsengimana Augustin w’imyaka 49 y’amavuko na Lt Col. Nzeyimana Fulgence (Bemba izina ry’inyeshyamba) w’imyaka 48 bahamije ko kuba muri Kongo hakigaragara FDLR bitavuze ko babuze ubaha amakuru y’iterambere ry’igihugu cyangwa ngo bayoberwe ko nta Politiki ihamye bagifite, ahubwo babiterwa n’inyungu za bamwe banga kuba bonyine bagafata bagenzi babo bugwate.

Aba basirikare barangije ingando mu cyiciro cya 56 i Mutobo mu cyumweru gishize, bafashe icyemezo cyo kwigobotora FDLR bibagoye ariko kubw’amakuru atabava mu matwi y’iterambere ry’urwababyaye barahumutse babona ko na bo uruhare rwabo rugikenewe mu kubaka igihugu.

Col. Nsengiyumva ahamya ko yabonye icengezamatwara rya FDLR ntaho ryamugeza ahitamo gutaha cyane ko we uretse gukurikira itangazamakuru rikorera mu gihugu, umugore we yatahutse mbere ye imyaka itanu akaba ari na we wahamyaga amakuru babonaga bakabwirwa ko ari impuha.

JPEG - 248 kb
Col. Nsengiyumva yahamije amakuru y’u Rwanda ayabwiwe n’umugore we wari umaze imyaka 3 atashye

Yagize ati “Hano mfite ababyeyi mvuka mu murenge wa Nyabitekerei mu karere ka Nyamasheke. Umufasha wanjye yageze igihe cyo gutaha mbere yanjye imyaka itatu; ibinyamakuru turabisoma Radio turayumva, ibyo byose byagombaga kumfasha kumenya amakuru nanjye ngafata icyemezo. N’abarwanya ubutegetsi bw’u Rwanda bakurikirana amakuru y’iterambere rugezeho ahubwo ikibazo ni imyumvire, amakuru ku muntu ujijutse aba ayafite.”

Lt Col. Nzeyimana ukomoka mu karere ka Burera mu Murenge wa Gatebe na we ati “Amakuru tuyumva kuri Radiyo Rwanda, n’andi maradiyo yose ari mu gihugu turayumva. Hafi y’abayobozi bose bafite amatelefoni afite internet. Ikintu cyanshimishije cyane ni uko nasanze igihugu gitekanye, abaturage bose bameze neza.”

JPEG - 317.4 kb
Col. Nsengiyumva yahawe impamyabushobozi y’ubumenyi yaherewe mu cyiciro cya 56 cy’ingando

Aba basirikare bari mu buyobozi bukomeye bwa FDLR bavuga ko abayobozi bashinjwa kugira uruhare muri Jenoside yakorewe Abatutsi ari bo baba bishakira ababaguma iruhande mu mashyamba bagakoresha amayeri yose babeshya abaturage, abenshi batemererwa gukurikirana ibibera mu Rwanda ko uhageze afatwa amajwi akicwa ubundi akaba ari yo akoreshwa mu gukangurira abandi gutaha.

Ni nde utanga amapeti muri FDLR…?

Nubwo hari bibaza uburyo abagize FDLR yashyizwe mu mitwe y’iterabwoba Col.Nsengimana na Lt. Col Nzeyimana bahamya ko bazamurwa mu ntera ku bw’amategeko abagenga bishyiriyeho, ubushobozi bw’abayahabwa ndetse n’ibyakorwa kugira ngo ibintu bigende neza

Col.Nsengiyumva yakoze imirimo myinshi muri FDLR aho kuva mu mwaka wa 2000 kugeza mu 2011 yari komanda wa batayo, ategeka amabatayo atandukanye, kuva mu 2011 kugeza mu 2015 ukwezi n’igice mbere y’uko atahuka ‘sous secteur’ igereranywa na Brigade nyuma yatahutse ari Umujyanama mu by’ingabo mu by’umutekano.

Kuri we ipeti rye yarigezeho riturutse ku rya Sous Lieutenant yahunganye nyuma ya Jenoside yakorewe Abatutsi, kuba atarigeze ava iruhande rw’abibwiraga ko bazagaruka mu Rwanda bateye bituma yongererwa amapeti.

Ati “Njye nazamurwaga mu ntera mu buryo busanzwe kubera ko ntabwo kuva nahunga mu 1994 nagumye mu mutwe wari ufite gahunda yo kugaruka mu gihugu ufashe intwaro. Ubwo byasabaga ko uko imyaka yagendaga nanjye nagombaga gutera imbere ariko na none ubwo byatewe n’iryo nari mfite.”

Lt. Col.Nzeyimana na we ati “Nasohotse mu gihugu mfite ipeti rya Sous Lieutenant. Bahereye ku mapeti twari dufite muri FAR bakomeje kuduhugura n’imirimo twakoraga tugenda tuzamuka mu ntera gutyo. Imirimo nakoze ni myinshi itandukanye muri FDLR, nagiye mba umuyobozi ushinzwe ubuyobozi n’ibikoresho (Administration and Logistic) mu mabatayo, nayoboye amakompanyi, amabatayo, nabaye ushinzwe administration mu brigade, nabaye umuyobozi mu ishuri rikuru rya gisirikare ari ryo ESM, ubu navuyeyo narashyizwe muri Komite nshingwabikorwa ya FDLR nshinzwe umutekano.”

JPEG - 306.7 kb
Lt. Col Nzeyimana (uwa 2 uvuye iburyo) ahamya ko mu mashyamba nta makuru y’u Rwanda batabona

Imibare ya FDLR ’yacitse intege’ ntivugwaho rumwe

Aba basirikare banenze bikomeye Kongo ikivuga ko abarwanyi ba FDLR babarirwa mu magana nubwo hari abatahuka n’abagwa mu bitero. Nubwo batabasha gusobanura ibyo kuba uyu mutwe ugiterwa inkunga, bavuga ko FDLR ibona ibikoresho byinshi ibyahuye FARDC cyangwa ikabigura n’abaturage b’iki gihugu mu buryo bw’ibanga.

Banenze Minisitiri w’Ubuubanyi n’Amahanga wa Kongo, Lambert Mende, uvuga ko mu mu gihugu cye hakibarirwa abarwanyi b’uyu mutwe batagera kuri 200. Col. Nsengiyumva ati “ Iyo ni imvugo y’Umunyapolitiki, abantu 100 yabashije kubabara yabasha no kubafata na we umubare ntabwo yawumenya, ndumva ushaka kumbaza ngo wowe ubona ari nka bangahe. Abasirikare ba FDLR ubu njye uko mbibona nkurikije uko imitwe ya gisirikare ihagaze, bagera ku 3000 babaye benshi barenga 4000 bakaba bari mu gace ka Sud-Kivu na Nord-Kivu.”

JPEG - 279.4 kb
Abagore bemeza ko barwaniraga ibyo batazi bafite n’abana bonsa mu mashyamba, bakabaye bari mu ishuri

Politiki ishingiye ku kinyoma no gukandamiza abashaka kumenya ukuri bagataha ni yo yahawe intebe muri FDLR. Abamaze gutahuka bemeza ko bemeye guhara ubuzima bwabo aho kugira ngo bahere mu mwijima bashorwamo n’abayobozi badahwema guhohotera abaturage.

Guverinoma y’u Rwanda ihamya ko ubu uyu mutwe udashobora guhungabanya umutekano w’igihugu cyane ko hari byinshi byagezweho muri uru rwego mu myaka 22 ishize.

Aba basirikare bari mu bakomeye barashishikariza abakiri mu mashyamba guhumuka bagaha agaciro amakuru babwirwaga ko ari impuha, kuko ugeze mu Rwanda wese ahasanga ukuri guhabanye n’ibyo yibwiraga.

Bafite intego zo gusubira aho bakomoka bagafatanya n’abandi gukomeza guharanira iterambere ryabo n’iry’igihugu, ndetse barashimira uburyo inzego z’igihugu zubatse mu buryo budahutaza uwo ari we wese wifuza kugera ku iterambere.

JPEG - 261.5 kb
Umusore wese wavukiye mu mashyamba ategekwa kuba FDLR
JPEG - 294.7 kb
Abagize amahirwe bakagera mu Rwanda babona barasigaye inyuma cyane
JPEG - 299.7 kb
Umuyobozi wa Komisiyo y’Igihugu ishinzwe gusezerera abahoze ari abasirikare, Sayinzoga Jean, yahamirije abemeye gutaha ko ntacyabateza imbere batakora mu gihugu
 

Comments

Who are you?
Your post
  • To create paragraphs, just leave blank lines.

 
 
RDC: EU irasabira ibihano 5 mu bashinzwe umutekano
RDC: EU irasabira ibihano 5 mu bashinzwe umutekano

Abagize Inteko ishinga amategeko y’Umuryango w’Ubumwe bw’u Burayi(EU), barasabira ibihano Abanyekongo 5 mu bashinzwe umutekano muri Repubulika iharanira demokarasi ya Congo (DRC) baregwa uruhare mu (...)

Abanzi ba Isiraheli bayitera guhora iryamiye amajanja
Abanzi ba Isiraheli bayitera guhora iryamiye amajanja

Isiraheli ni kimwe mu bihugu byo mu Burasirazuba bwo hagati gifite abanzi benshi. Kubera iyi mpamvu, ubutegetsi bw’iki gihugu cy’Abayahudi buhora bwiteguye mu rwego rwo kwirinda ibitero by’abanzi. (...)

Perezida Kagame yitabiriye inama idasanzwe ya CEEAC muri Gabon
Perezida Kagame yitabiriye inama idasanzwe ya CEEAC muri Gabon

Perezida Paul Kagame na Madamu Jeannette Kagame bitabiriye inama idasanzwe y’abakuru b’ibihugu bigize Umuryango w’ubukungu bw’ibihugu byo muri Afurika yo hagati (CEEAC) i Libreville muri Gabon, kuri (...)

Burundi: Willy Nyamitwe yarokotse urupfu
Burundi: Willy Nyamitwe yarokotse urupfu

Umuyobozi ukuriye ishami ry’itumanaho muri Perezidansi ya Leta y’u Burundi, Willy Nyamitwe, yarokotse igitero cy’abashakaga kumwica ku wa mbere tariki 28 Uguahyingo. Amakuru dukesha BBC agaragaza (...)

UK: Abanyarwanda barokotse Jenoside babangamiwe n’abayikoze bacyidegembya
UK: Abanyarwanda barokotse Jenoside babangamiwe n’abayikoze bacyidegembya

Ihuriro ry’Abanyarwanda barokotse Jenoside yakorewe Abatutsi baba mu Bwongereza babangamiwe cyane n’uko abagize uruhare muri iyi Jenoside yatwaye ubuzima bw’abasaga miliyoni bacyidegembya muri iki (...)

Advertisement

OPP. MAGERWA, EXPO GROUND, GIKONDO KIGALI, RWANDA PHONE NO : +250-784867952 / 53

© Copyright 2015: Imvaho Nshya. All rights reserved.
Powered by: RPPC.