Advertisement
 
 
 
 
 
 
 
 

Amakuru | Mu Mahanga

Abanzi ba Isiraheli bayitera guhora iryamiye amajanja   

  Yanditswe na KAYIRA ETIENNE
 1 month ago

 
 

Isiraheli ni kimwe mu bihugu byo mu Burasirazuba bwo hagati gifite abanzi benshi. Kubera iyi mpamvu, ubutegetsi bw’iki gihugu cy’Abayahudi buhora bwiteguye mu rwego rwo kwirinda ibitero by’abanzi.

Ku wa 27 Ugushyingo, ingabo za Isiraheli zatangaje ko zishe abarwanyi 4 bo mu mutwe w’abaharanira Leta ya kiyisilamu ku isi EI(Etat islamique).

Abo barwanyi biciwe mu gace ka Golan, agace kabarizwa ku butaka bw’igihugu cya Siriya ariko kagenzurwa na Isiraheli kuva kera kose. Radio Mpuzamahanga y’u Bufaransa yakurikiranye iby’iyi nkuru igira iti “Abo barwanyi ba EI nibo bagabye ibitero ku Bisiraheli batuye muri Golan, bituma ingabo z’iki gihugu zibarasa zitababariye zibicamo abagera kuri bane”.

Kuva Isiraheli yigarurira aka gace ka Golan uhereye mu mwaka wa 1967, ngo ni bwo bwa mbere abanzi bagabye igitero ku basirikare babo ku mugaragaro. Ubundi wasangaga batega nk’igisasu cyangwa bakaba barasa ku bantu bagahita bahunga batarwanye.



Ku busesenguzi bwa Leta ya Isiraheli, iki gitero cy’abarwanyi b’umutwe wa kiyisilamu mu gace ka Golan, kigaragaza neza ko imirwano ya Siriya igenda ikwirakwira no mu bice itageramo. Ni muri urwo rwego Minisitiri w’intebe wa Isiraheli Benyamin Netanyahu ngo yashimiye cyane ingabo z’igihugu cye uburyo zivunnye umwanzi zitazuyaje.

Ari mu nama ya Guverinoma iterana buri munsi nk’uko bisanzwe, Netanyahu yagize ati “Ndashimira cyane Ingabo z’igihugu cyacu kuko zihora ziri maso mu majyaruguru. Nta na rimwe tuzemera ko abarwanyi b’umutwe wa Leta ya kiyisilamu bavogera imipaka yacu bitwaje intambara barwanira muri Siriya”.

Akenshi imisozi ya Golan, igwamo ibisasu biraswa bivuye muri Siriya ariko ngo bitandukanye cyane n’igitero cy’ejo bundi ku cyumweru aho abarwanyi EI barwanyije abasirikare ba Isiraheli ku mugaragaro.

Umunyamakuru wa RFI ukorera i Yerusalemu Michel Paul, yamenyesheje ko Umuvugizi w’Ingabo za Isiraheli yabatangarije ko nta musirikare w’igihugu cye wapfiriye muri iyo mirwano yabereye i Golan cyangwa ngo akomereke.

Mu cyumweru gishize na none, Isiraheli yibasiwe n’inkongi y’umuriro yadukiriye agace ko mu gihugu rwagati uhereye ku wa Kane kugeza ku munsi w’icyumweru bakirimo kuwuzimya hifashishijwe indege.

Abisiraheli batuye aho hibasiwe n’inkongi y’umuriro, ntibatinya kuvuga ko byakozwe n’abanzi babo b’Abanyapalestina. Miri Maoz-Ovadia, umuvugizi wo muri iyo midugudu bita iya gikoloni yibasiwe n’umuriro yatangaje ko nta gihamya barabona ko iyo nkongi yaba yatewe n’abagizi ba nabi.

Gusa, iyo nkongi ngo yatwitse amazu yubakishije ibiti agera 18 ariko nta muntu wapfiriyemo. Mu rwego rwo gukora iperereza ryo gushaka kumenya abakongeje uwo muriro, nibura ubutegetsi bwari bumaze guta muri yombi Abanyapalestina 23 bakekwa muri ubwo bugizi bwa nabi. Kubera kugwiza abanzi, Isiraheli ihora iryamiye amajanja kandi ngo ntijenjeka mu kwihora abagerageza kuyitera.

 

Comments

pre-moderation

Igitekerezo cyanyu kiragaragara kimaze gusumwa n'umwanditsi mukuru wa Imvaho Nshya

Izina Ryanyu
IGITEKEREZO

 
 
Senegal yohereje ingabo  ku mupaka wa Gambia guhirika Perezida Jammeh
Senegal yohereje ingabo ku mupaka wa Gambia guhirika Perezida Jammeh

Igihugu cya Senegal cyashyize ingabo ku mupaka wa Gambia aho ziteguye guhirika Perezida Yahya Jammeh watsinzwe amatora akanga kuva ku butegetsi. Nubwo Senegal ari yo iyoboye igitero, iri kumwe (...)

Tanzania: Lowassa wahanganye na Perezida Magufuli mu matora yatawe muri yombi
Tanzania: Lowassa wahanganye na Perezida Magufuli mu matora yatawe muri yombi

Edward Lowassa wahoze ari Minisitiri w’Intebe akaba ari nawe mukandida ufatika wari uhanganya na Perezida John Pombe Magufuli yatawe muri yombi by’akanya gato azira gukoresha inama atabifitiye (...)

Zimbabwe: Umupasiteri afungiwe guhanura ko Perezida Mugabe azapfa muri uyu mwaka
Zimbabwe: Umupasiteri afungiwe guhanura ko Perezida Mugabe azapfa muri uyu mwaka

Umupasiteri witwa Patrick Mugadza yatawe muri yombi ku wa mbere azira guhanura ko perezida wa Zimbabwe, Robert Mugabe azapfa muri uyu mwaka wa 2017. Mu kiganiro n’itangazamakuru, uyu mupasiteri (...)

Trump yatangaje ko azavaniraho u Burusiya ibihano
Trump yatangaje ko azavaniraho u Burusiya ibihano

Donald Trump watorewe kuyobora Leta Zunze Ubumwe za Amerika yatangaje ko agiye kuvaniraho u Burusiya ibihano kugira ngo nabwo bwemere kugabanya ibisasu bya kirimbuzi bufite. Mu kiganiro (...)

U Burayi: Ubukonje bukabije bumaze guhitana abantu 65
U Burayi: Ubukonje bukabije bumaze guhitana abantu 65

Abantu 65 bamaze kwicwa n’ubukonje bukabije mu duce dutandukanye tw’u Burayi cyane cyane mu gihugu cya Bulgaria. Abenshi mu bapfa biganjemo abasheshe akanguhe n’abatagira aho batuye; barimo umusaza (...)

Advertisement

OPP. MAGERWA, EXPO GROUND, GIKONDO KIGALI, RWANDA PHONE NO : +250-784867952 / 53

© Copyright 2015: Imvaho Nshya. All rights reserved.
Powered by: RPPC.